Dźensa zetkachu so čłonojo prezidija na swoje 6. rjadne posedźenje w aktualnej wólbnej dobje w Budyskim Serbskim domje.

Mjez druhim přihotowachu přichodne posedźenje Zwjazkoweho předsydstwa Domowiny, kotrež budźe 5. hodownika w Choćebuzu. Na tutym budźe so wosebite připóznaće młodeje ekscelency w delnjoserbšćinje přepodać. Tute hódnoći wuspěšne nawuknjenje delnjoserbskeje rěče na wysokim schodźenku, kiž leži widźomnje nad zakładnym, wšědnym niwowom komunikacije.

Tež wo aktualnosćach imersiwneho kursa Zorja a wo widejowym projekće za wšelakorosć w Delnjej Łužicy budu přitomni zwjazkoweho předsydstwa zhonić. Dale předstaji so aktualna ewaluacija rěčnych kmanosćow šulerjow. Nic naposledk ma so na posedźenju zwjazkoweho předsydstwa tež festiwalny wuběrk za přihot přichodneho festiwala schwalić. Organizaciju lětušeho XV. Mjezynarodneho folklorneho festiwala mějachu Gabriel Krawc (Serbska rejowanska skupina Smjerdźaca), Błažij Handrik (Serbski folklorny ansambl Wudwor), Marko Kliman (gmejna Chrósćicy), Katharina Jurkowa a Pětr Brězan (ze stron Domowinskeho zarjada) w horšći.

Kónc nowembra, 26.11., schadźuje so poradźowacy wuběrk za prašenja serbskeho ludu w Berlinje. Wobdźělić budu so ze stron Domowiny předsyda Dawid Statnik, městopředsyda dr. Hartmut Leipner kaž tež hłowna jednaćelka Judit Šołćina a jednaćel Marcus Końcaŕ. Dalši serbski zastupjer we wuběrku je Załožba za serbski lud.

Mjez druhim chce Domowina přitomnych – zapósłancow zwjazkoweho sejma, čłonow Zwjazkoweho nutřkowneho ministerstwa – namołwjeć, so wo zwoprawdźenje zapisanja narodnych mjeńšin do zakładneho zakonja prócować. Tež realizaciju rozsuda konferency kultusowych ministrow za posrědkowanje wědy wo štyri awtochtonych narodnych mjeńšinach a ludowych skupinach Němskeje, kaž tež rěčnikow delnjoněmčiny chce předsyda Dawid Statnik přitomnym poradźowaceho wuběrka na puć dać.

Nimo toho deleguje prezidij dr. Hartmuta Leipnera, Bena Bělka a Clemensa Škodu na FUEN seminar słowjanskich mjeńšinow wot 20.-23.11.25 w Goricy (Italska) pola słowjenskeje mjeńšiny.