Na přeprošenje předsydy Domowiny Dawida Statnika wopyta pjatk, dnja 17.10.2025, Andreas Fritsch Serbski dom w Budyšinje. Wot 1. oktobra je wón nowy direktor rozhłosa MDR Sakska (MDR-Landesfunkhaus Sachsen).

Na rozmołwje wobdźělichu so nimo předsydy Domowiny a direktora MDR Sakska tež nawodnica studija MDR Budyšin Bogna Korjeńkowa, čłon rozhłosoweje rady MDR Bjarnat Cyž, kaž tež jednaćelka Domowiny Judit Šołćina.

W srjedźišću rozmołwy stejachu zeznaće a aktualne wužadanja Serbow wosebje z wusměrjenjom na medije a rólu zjawnoprawniskeho sćelaka MDR, kiž wudźeržuje regionalne studijo Budyšin, přez kotrež so wšědnje serbska rěč do swěta wusyła. MDR steji w přichodźe před wulkim wužadanjom masiwnych skrótšenjow financnych srědkow.

Serbski rozhłós pak ma wosebity wuznam za komunikaciju a tworjenje měnjenja w serbskim ludźe. Domowina pokaza na to, tole při trěbnym wurunanju etata MDR hladajo na serbske poskitki wobkedźbować a w serbskim wobłuku njelutować. Wšako je prezenca serbšćiny a serbskeje kultury w medijach přewšo wažna, zo by serbšćina wšědnje zjawnje widźomna a słyšomna była. Poskitk MDR Serbja njeje jenož přez rozhłós prezentny, ale mj. dr. ze swójskej app kaž tež na socialnych medijach.

Foto: Domowina/Božena Šimanec