Kak spytachu ludźo před sta lětami wšědne problemy na zakładźe wopřisahanjow, wobrjadow, symbolow abo magiskich objektow zmištrować? Wo tym zhonichu čłonojo prezidija dźensa w jimacym wjedźenju dr. Susanny Hozyneje přez aktualnu wustajeńcu Kamjenskeho muzeja Zapadna Łužica. Aktualna wustajeńca zaběra so z přiwěru a magiju – instrumentami, z kotrymiž so w tehdyšim času wužadanjam wšědneho dnja stajachu. Hač do 12.04.2026 je wustajeńca hišće wotewrjena. Štóž ma zajim na serbskim wjedźenju, móže dr. Hozynu narěčeć. Cyle wćipni móža sej termin 10.02.2026 w kalendrje markěrować. To budźe přednošk wo přiwěrkach w našich nałožkach.

Župna pawšala

Prezidij je sumu za lětuše projekty župow wo 3.000 € zwyšił. Z powyšenej pawšalu je prezidij potrjebje swojich čłonow wotpowědował.

Za lěto 2026 planuja župy aktiwity z wudawkami we wysokosći 26.960 €. Tak planuja w regionach mj. dr. projektne dny šulerjow wo wšelakich temach, kubłanske jězby kaž tež dźěłarnički wo rěči abo nałožkach.

Brigada pojědźe do Liberec

Prezidij je dorostowy chór 1. serbskeje kulturneje brigady a rejowansku skupinu na koncertaj towarstwa Societas Amicuum Liberec wot 17.-19.04.2026 do Liberec delegował. Z tym přewza Domowina wudawki za transport.

Jury Myta Zejlerja

Nimo toho je prezidij Leńku Thomasowu za sobudźěło w jury Myta Zejlerja na dobu 2026-2031 pomjenował.

Rezimej prezidija

Prezidij je so lětsa wosom razow zetkał. Čłonojo zhladuja na dźěłapołne lěto 2025. “Wosebje Myto za hospodarstwo běše lětsa wjeršk. Za politiski wuspěch mamy, zo je zwjazkowa rada zapodała namjet za zakótwjenje narodnych mjeńšinow do Zakładneho zakonja”.

W mjenje zwjazkoweho předsydstwa dźakuje so prezidij wšěm čestnohamtskim čłonkam a čłonam, kaž tež sobudźěłaćerkam a sobudźěłaćerjam za dobre a wuspěšne skutkowanje na dobro serbskeho ludu.