Domowina: Cil serbskeje změny strukturow su nowe rěčne rumy – „hybridne” posedźenje zwjazkoweho předsydstwa z „2 G plus”

Kruteho stawa pandemije dla je so posedźenje Zwjazkoweho předsydstwa (ZP) Domowiny pjatk wječor pod wuměnjenjemi „2 G plus” wotměło. Jenož dwójce šćěpjeni mějachu přistup a dyrbjachu so do zastupa do žurle Serbskeho domu w Budyšinje na městnje na koronu testować dać. Wuradźowanje běše – kaž je wot lońšeho z wašnjom – hybridne, to rěka někak połojca přitomnych čłonow gremija je so w formje widejokonferency wobdźěliła. Zajimcy sćěhowachu zjawne posedźenje přez livestream.

ZP měješe retomas temow na starosći, nimo informacijow wo běžnej dźěławosći zarjada třěšneho zwjazka a jeho Rěčneho centruma Witaj (RCW) tón raz schwalenje zamołwitosćow za zwoprawdźenje dźěłowych směrnicow we wólbnej periodźe a wobsadźenje wuběrkow ZP. Po tym zo su so wšitcy čłonojo za sobudźěło přizjewili, móža tute dźěłowe koła nětkole z podpěru referentow Domowiny skutkować započeć a dalšich wěcywustojnych zapřijeć. Zdobom su woni nowy jednanski porjad ZP a jeho prezidja wobzamkli.

Ćežišćo posedźenja běše spěchowanje serbskich projektow we wobłuku změny strukturow. ZP podpěruje stejišćo swojeho prezidija Załožbje za serbski lud, zo dyrbjeli so spěchowanske srědki prěnjotnje za tworjenje přidatnych serbskorěčnych rumow we wšěch regionach nałožować. Při tym měło so dołhodobne zasadźenje personala zaručeć. Předsyda Domowiny, Dawid Statnik, je stejišćo wopodstatnił: „Je wažne, zo njetrjebaja so za rěč angažowani stajnje z próstwami za přizwolenje projektow bědźić, ale zo móža so połnje za hłowny zaměr koncentrować: wšudźe nowym nošerjam serbšćiny puć do serbskeho žiwjenja rubać.”

Pozadk: W Sakskej ma załožba „serbske srědki” na zakładźe zwjazkoweho zakonja wo zesylnjenju strukturow w dotalnych brunicowych rewěrach rozdźělować – porno Braniborskej, hdźež su so na poł ducenta wulkoprojektow dojednali. Na dnjowym porjedźe steješe tež informacija wo mjezystawje projekta w ramiku změny strukturow „Forum wědy na Lawskim arealu”.

Prawidłownje so ZP z połoženjom župow zaběra, wšako pućuje gremij zwonka časa pandemije přez wšě regiony. To drje tuchwilu móžno njeje, ale najebać to běše pjatk wječor w Budyšinje předstajenje aktualneje situacije župy „Michał Hórnik” Kamjenc prěni dypk dnjoweho porjada. Na kóncu zjawneho posedźenja informowaše dotalny zastupjer Serbow w Sakskej krajnej wustawje za priwatny rozhłós a nowe medije (SLM), Dawid Statnik, wo swojej dźěławosći z 2016 sem.

Do tutoho gremija powoła Zwjazkowe předsydstwo Domowiny Dawida Statnika jako zastupjerja zjednoćenstwow Serbow na dalšu wólbnu dobu 2022-2028.

Comments and Responses

×

Name is required!

Enter valid name

Valid email is required!

Enter valid email address

Comment is required!

Captcha Code Can't read the image? Click here to refresh

Captcha is required!

Code does not match!

* These fields are required.

Be the First to Comment