Diskusija w zwjazkowym předsydstwje Domowiny wo móžnej změnje strukturow Załožby za serbski lud

Pjatk wječor je so zwjazkowe předsydstwo (ZP) w rumnosćach Serbskeho ludoweho ansambla w Budyšinje schadźowało. Pod nawodom předsydy Domowiny Dawida Statnika je so nawjedowacy gremij narodneje organizacije mjez druhim zwołanju klětušeje hłowneje zhromadźizny 22. apryla w Choćebuzu, planej posedźenjow a změnje jednanskeho porjada ZP a jeho prezidija, rozprawje a dźěłowemu planej Rěčneho centruma WITAJ (RCW) wěnował. Ćežišćo wuradźowanja běše rezimej dźěławosće serbskich załožbowych radźićelow w so nachilacej wólbnej periodźe rady Załožby za serbski lud.

Rjadni čłonojo tučasneje doby su Susann Šenkec, předsydka załožboweje rady, Bjarnat Cyž, Julian Nyča, dr. Daniel Měrćink (ze Sakskeje), Marcus Końcaŕ a Frank Kosyk (z Braniborskeje), jako zastupowacy čłonojo skutkuja dr. Lubina Malinkowa, Marlis Młynkowa, Katharina Jurkowa, Marko Dźisławk (hač do 31.7.2021, potom) Dr. dr. Jürgen Rühmann (ze Sakskeje), Diana-Susanne Šejcowa a Babett Zenkerowa (z Braniborskeje). Wosebity nadawk serbskich radźićelow je, nimo załožboweje rady a komisije tež w projektowej přiradźe skutkować, kiž za wšitke zapodate próstwy doporučenje za spěchowanje wotedawa.

W mjenje dotalnych radźićelow je Bjarnat Cyž žadanje předstajił, zo změja Serbja přichodnje status samostatneho gremija a konkretnu zarjadnisku kapacitu, zo bychu sami wo wšěch naležnosćach inwesticijow a spěchowanja rozsudy samostatnje tworić a dohladowansku funkciju nad załožbowym zarjadom wukonjeć móhli. Statne zrěčenje měło so wotpowědnje přiměrić. Zastupjerjo tak mjenowanych pjenjezydawarjow bychu tute wobzamknjenja jenož hišće prawnisce pruwować směli. Julian Nyča skedźbni na dotalny „systematiski zmylk”, zo njemóža so woleni serbscy radźićeljo přesadźić, hdyž je załožbowy zarjad hinašeho měnjenja. Jürgen Rühmann přeje sej, zo njebudu čestnohamstcy přichodnje hižo tak krótkodobnje informowani, zo móža jenož hišće wothłosowane stejišćo zarjada a pjenjezydawarjow na wědomje brać.

Susann Šenkec chwaleše dźěło serbskich čłonow załožboweje rady: „Mamy přewšo dobrych radźićelow.” Marja Michałkowa witaše realistiske wopisanje aktualneje situacije, je wšak skerje skeptiska dla krótkodobneho přesadźenja žadanjow, widźi pak móžnosće při přemyslowanym krótko-, srjedzno- a dolhodobnym postupowanju. Wito Bejmak je wuwjedźenja radźićelow tež jako wotmołwu na žadanje zrozumił, dźěło załožby ewaluować, wšako jemu dotal „nošna struktura” faluje. Jan Bělk ma „nowe formy” dźěła radźićelow za trěbne, dokelž ryzy čestnohamtskosć hižo wužadanjam njewotpowěduje. Dawid Statnik so dźakowaše załožbowym radźićelam a wosebje Susan Šenkec, dokelž su wuspěchi zašłych lět z jeje njesprócniweho angažementa wurostli. Hłowna jednaćelka Judit Šołćina so prašeše, hač by zmysłapołne było, wólby nowych čłonow rady přestorčić, kotrež su za januar planowane. Wo tym pak njeje zwjazkowe předsydstwo wothłosowało.

Dale je zwjazkowe předsydstwo zastupjerjow Domowiny w Poradźowacym wuběrku za prašenja serbskeho ludu poboku zwjazkoweho ministerstwa nutřkowneho za wólbnu periodu hač do 2025 powołało, Dawida Statnika a městopředsydow dr. Hartmuta Leipnera a Marka Hančika, jako naměstnikow hłownu jednaćelku Judit Šołćinu, jednaćela Marcusa Końcarja a referentku za naležnosće třěšneho zwjazka, Madlenku di Sarnowu. Do přihotowanskeho wuběrka za mjezynarodny folklorny festiwal Łužica 2023 je gremij Gabriela Krawca (Serbska rejowanska skupina Smjerdźaca), Ambroža Handrika (Serbski folklorny ansambl Wudwor), Janu Pětrowu (Załožba za serbski lud), Marka Klimana (gmejna Chrósćicy), Marka Kowarja (Domowina) a Marcusa Końcarja (Delnja Łužica) powołało.

W zwisku z rozprawu RCW je nawodnica dr. Beata Brězanowa wuzběhnyła, zo přełožowanski program „sotra” nětko tež za delnjoserbšćinu předleži. Dalši wuspěch je postup z certifikaciju rěčnych kmanosćow, tak wona tuchwilu tež ewaluaciji modela 2plus w nadawku sakskeho kultusoweho ministerstwa dopomha. To, kaž předsyda Dawid Statnik praješe, polěpšenje rěčneho kubłanja podpěruje. Na kóncu zjawneho posedźenja informowaše Statnik, zo Kito Ela, zastupjer župy „Dolna Łužyca”, z wosobinskich přičin swój mandat w zwjazkowym předsydstwje kónc lěta złoži.

Wobraz: Dołholětna předsydka załožboweje rady, Susan Šenkec, zwjazkowemu předsydstwu Domowiny na posedźenju w chórowej rumnosći Serbskeho ludoweho ansambla přednošuje. Foto: Domowina/M. Brauman 

Comments and Responses

×

Name is required!

Enter valid name

Valid email is required!

Enter valid email address

Comment is required!

Captcha Code Can't read the image? Click here to refresh

Captcha is required!

Code does not match!

* These fields are required.

Be the First to Comment