Župne předsydstwo župy „Jan Arnošt Smoler” Budyšin zhoni štwórtk, 5.5., na swojim posedźenju w rumnosćach motiwatora Domowiny za serbsku rěč w Malešan kónčinje, w Přiwćicach, wo přichodnych projektach Luciana Kaulfürsta. Na přikład budźe 29. julija serbski lěćny swjedźeń w Přiwćicach ze serbskim programom a serbskim spěwnym wječorom. Dale chce Kaulfürst serbske dźěćace radijo za dźěći z wokoliny hromadźe z medijowej etažu Budyskeho Serbskeho domu krok po kroku natwarić. Radijowe wusyłanja maja być lětsa w druhim połlěće, wěste techniske nastroje dyrbja hišće wobstarać a za projekt dźěći a swójby wabić. Nimo toho planuje Lucian Kaulfürst, taflički po wsy zestajeć, kiž puć do jeho běrowa pokazuja. Leńka Thomasowa, amtěrowaca županka, dźakowaše so Kaulfürstej za dotalnu prócu a přeješe jemu wuspěch za dalše projekty.

Čłonojo hódnoćichu nalětni koncert z chórom Meja njedźelu, 1. meje, w Malešanskej cyrkwi jako jara poradźeny, nazběrało na darach je so dohromady 364,40 €, kiž přewostaja so podźělnje cyrkwi resp. wosadźe Hrodźišćo (Kirchspiel Gröditz) a ćěkańcam z Ukrainy. Dale diskutowachu wo namjetach za Myto Domowiny, za Myto Domowiny za dorost a za čestne znamješko – namjety maja so hač do kónca junija zapodać.

Woni su tež projektny tydźeń na česć Zejlerja a Kocora minjeny tydźeń we Wojerecach rozjimali, hdźež běchu šulerjo 8. lětnika z Hornjeje Łužicy přeprošeni, bliže zeznać žiwjenje a skutkowanje wobeju wótčincow. Zaběrachu so z fabulemi Handrija Zejlerja a z hudźbnym tworjenjom Korle Awgusta Kocora, runje tak kaž z jeju žiwjenjoběhom. Rjemjesło zašłych časow zeznachu při staciji, na přikład kak so len předźěłuje za přazu a kak su tehdy butru dźěłali.

Informacije: Regionalna rěčnica Katja Liznarjec.