A hižo je so zakónčił – naš XV. mjezynarodny folklorny festiwal Łužica-Łužyca-Lausitz. Něhdźe 300 hosći wukrajnych kulturnych skupin běchu so k nam do Łužicy podali, zo bychu z něhdźe 500 serbskimi kulturnymi akterami přihladowarkam a přihladowarjam festiwala pisany a wotměnjawy program w Budyšinje, Hochozy a Chrósćicach skićili. W pozadku su 300 pomocnicow a pomocnikow skutkowali – hač na dworach, mjez programami a nic naposledk w organizaciji. Najwutrobniši dźak słuša tuž wšěm čestnohamtskim akteram, kotrež tutón festiwal na nohi stajeja.

Tež lětsa je festiwal zaso syłu přihladowarjow dosćahnył – w Budyšinje a Hochozy tróšku mjenje hač před lětomaj, za to běchu jubilejne Chrósćicy na dwěmaj dnjomaj zaso jara derje wopytane. Jako pjatk a sobotu rańše zerja schadźachu běchu hišće słyšeć serbske zynki na droze. Tak kaž zaklinči na kóncu sobotnišeho programa na Zahrodnikec dworje znaty spěw „festiwal“ kiž zaspěwa publikum hromadźe ze skupinu Popsorben, nadźijamy so, zo zdźeržimy sej hišće dołho wutrobitosć a zahoritosć lětušeho festiwala we našich wutrobach. 

Běše to prěni festiwal pod nawodomdwójki - Kathariny Jurkoweje a Pětra Brězana. Nimo toho běše prěni raz w nowym šaće. Design je so 2023 na kóncu festiwala hižo předstajił. Nic jenož wonkowny wobraz bě nowy. Festiwal bywa krok po kroku tež načasniši – hač bě to móžnosć, tiket w předpředani online kupić, při tej abo tamnej kasy z EC-kartu płaćić abo aktualnemu programej abo widejam na socialnych syćach sćěhować. My Serbja dźemy z časom.

Štóž ma dalše pokiwy a namjety do přichoda, njech nam mailku rady na info@folklorny-festiwal.de sćele. Wjeselimy so přez konstruktiwnu kritiku  a pokiwy z ludu, zo bychmy ideje za přichodny festiwal wobkedźbować móhli.

Dalša nowostka bě selfiewall srjedź Chrósćic – sćěna, před kotrejž móžachu so přitomni fotografować a z tym pokazać, zo su naš folklorny festiwal wopytali. Je to wunamakanka z digitalneho swěta. Serbske słowo tuž hišće nimamy. Tohodla smy na socialnych medijach štyri namjety za słowo na wothłosowanje dali. Wutrobny dźak kursistam Domoj-projekta, kotřiž su ideje nazběrali. Wjetšina hłosowaše za słowo fotowańčko. Snadź so tute přesadźi?

Najpozdźišo na přichodnym festiwalu wěmy wjac. Štóž njeměješe hišće składnosć so před fotowańčkom zwěčnić, ma tomu hišće w lětnych prózdninach chwile. Najrjeńši wobraz budźemy mytować (pod #folklornyfestiwal).

Wjeselimy so hižo nětko na naš přichodny festiwal, kiž budźe 8.-11.07.2027.

Projekt je spěchowałaZałožba za serbski lud, kotraž dóstawa lětnje přiražki z dawkowych srědkow na zakładźe hospodarskich planow, kotrež su Němski zwjazkowy sejm, Krajny sejm Braniborskeje a Sakski krajny sejm wobzamknyli. Nimo toho stej komunje Chrósćicy a Hochozy podpěrowałoj, kaž tež kulturny rum Hornja Łužica-Delnja Šleska, wokrjes Budyšin a město Budyšin. Dźak słuša nimo toho wšitkim sponsoram a podpěraćelam.