Dźesać dźěći Malešanskeje Witaj-pěstowarnje pod nawodom Carolin Jurkoweje, zahaji srjedu popołdnju hłownu zhromadźiznu tamnišeje Domowinskeje skupiny ze serbsko-němskimi spěwom.

Po tym rozprawješe předsydka skupiny, Maritta Schneider, wo na wjerškach bohatym lěće w Malešecach. Bilancowaše wosebje 800lětny jubilej wsy jako jara radźeny. Domowinska skupina Malešecy je na tym wulki podźěl měła, wšako je so předsydstwo wo serbske poskitki w hosćenu “Wódny muž” starało. Chwaleše sebi zhromadne spěwanje chórow, kotryž su tři serbske chóry wobohaćili. Předsydka wuzběhny zdobom nalětni koncert, kiž je 1. Serbska kulturna brigada přewšo pozitiwnym wothłosom runje tak wuhotowała. Zajim čłonow a hosći je runje tak čitanje z knihi “Malešecy před 200 lětami” zbudźiło. Za klětu maja znowa koncert w cyrkwi planowany, kiž budźe 31. meje. “Chcemy z předewzaćemi našu zhromadnosć skrućić a za to so zasadźujemy”, wuzběhny předsydka. 

Skupina ma tuchwilu 25 čłonow. Dwě nowej čłonce stej so lětsa skupinje přidružiłoj. Kóžde lěto požada skupinske spěchowanje, kiž Domowina swojim čłonskim towarstwam přewostaja.