Pod nawodom předsydki Serbskeho šulskeho towarstwa (SŠT), Kathariny Jurkoweje, su so skupina 25 serbskich wučerjow a studentow wučerstwa, kubłanska referentka Domowiny, Katrin Suchec-Dźisławkowa, a čłonki předsydstwa SŠT na wuměnu nazhonjenjow mjez mjeńšinami do Južneje Schleswigskeje podali. Na programje steješe wutoru wuměna ze šulskim towarstwom danskeje mjeńšiny a wopyt zakładneje šule a gymnazija Danow. Srjedu chcedźa so hosćo z Łužicy Sewjernym frizam wěnować, z hospitaciju na šuli, hdźež šulerjo frizisce, dansce a němsce wuknu. Štwórtk ludowu šulu danskeje mjeńšiny wopytaja. Sakske kultusowe ministerstwo je jězbu financowało, kotruž SŠT a krajny zarjad za šule a kubłanje organizowatej. Program je Susan Šenkec zestajała, wona wobdźělnikow přewodźa.

Katharina Jurkowa, předsydka Serbskeho šulskeho towarstwa (SŠT): „Wjeselimy so jara, zo je telko wučerjow a studentow poskitk za zeznaće druhich mjeńšinowych šulskich systemow, wosobinsku wuměnu a rozšěrjenje horiconta wužiło. Nimo nastorkow za wuwučowanje serbšćiny a skrućenje našeje rěče na šulach dźe wězo tež wo wuměnu mjez serbskimi wučerjemi a studowacymi wučerstwa wšelakich formow šulow. So wě, zo chcemy pedagogiski dorost za dwurěčne kubłanje sensibilizować a za aktiwne sobudźěło w SŠT wabić. Jako nadregionalny stołp bazodemokratiskeje Domowiny chcemy pedagogisku bazu z jeje fachowej wědu do procesa dalewuwića kubłanja w narodnym duchu aktiwnje zapřijeć.” 

Foto: SŠT