Prezidij přihotowaše na swojim wčerawšim posedźenju mjez druhim Mjezynarodny folklorny festiwal Łužica – Łužyca, kiž wotměje so wot 26. – 29.06.2025. Za wšitke městnosće festiwala su čestni hosćo připrajili: zapósłancy zwjazkoweho sejma a krajneju sejmow, knježerstwow, komunow a dalši partnerojo Domowiny. 
Sobotu w Chrósćicach budźe z hosćom Ralf Ludwig, intendant MDR a njedźelu dr. Bernd Fabritius, społnomócnjeny zwjazkoweho knježerstwa za prašenja wusydlencow a narodne mjeńšiny.

Hač do pjatka, 20.06. móža sej zajimcy zastupne lisćiki za festiwal w předpředani kupić. Wosebje za swjedźenske wotewrjenje festiwala – gala-program – štwórtk, 26.06. w 19.30 hodź. na hłownym jewišću Němsko-Serbskeho ludoweho dźiwadła w Budyšinje su hišće kartki (link k předstajenju).

Delegowanja

Domowina deleguje Katharinu Jurkowu a Pětra Brězana, kotrajž jako dwójka Mjezynarodny folklorny festiwal Łužica – Łužyca nawjedujetaj, na CIOFF-kongres. Tutón budźe wot 12.-14.09.25 w Heppenheimje. W ramiku kongresa wotměje so lětna hłowna zhromadźizna němskeje sekcije CIOFF. CIOFF je swětowa organizacija folklornych skupinow a zarjadowarjow folklornych festiwalow. Jedyn z jeje hłownych zaměrow je škit imaterielneho kulturneho herbstwa.