We Wojerecach swjeća krajnu domchowanku

Wot 12. do 14. septembra 2025 swjećimy we Wojerecach 26. Saksku krajnu domchowanku. Wjerški su mjez druhim prezentacija žnjenskich krónow, swjatočne kemše a swjedźenski ćah po měsće.

Wo serbski podźěl na kóncu tydźenja je so županka Wojerowskeje Domowinskeje župy Gabriela Linakowa postarała, kotraž je akterow hromadźe zwjedła. Dohromady je 15 serbskich towarstwow a institucijow wobdźělenych, mjez nimi Witaj-pěstowarnje a rejowanske skupiny, kotrež ze swojimi přinoškami wšelakorosć a žiwu tradiciju serbskeje kultury prezentuja.

Program (wuběr)

• wutoru, 09.09.25, w 16:30 hodź. prezentuja so žnjenske króny we Wojerowskej Janskej cyrkwi
• pjatk, 12.09.25, w 15:00 hodź. přewjedźe so swjatočnosć składnostnje połoženja zakładneho kamjenja „70 lět Wojerecy Nowe Město“ we Łužiskej hali
• sobotu, 13.09.25, w 16:30 hodź. mytuje so najrjeńša žnjenska króna w Janskej cyrkwi
• njedźelu, 14.09.25, w 10:00 hodź. ekumeniska Boža słužba pod nawodom fararja Heinricha Kocha w Janskej cyrkwi
• njedźelu, 14.09.25, w 13:00 hodź. swjedźenski ćah po Wojerecach

Cyłkowny program a dalše informacije su tu wozjewjene: https://www.landeserntedankfest-sachsen.de/

+++

Kula Bula w Praze

Towarstwo přećelow Serbow a Sakske zastupnistwo w Praze přeprošujetej na wosebitej kulturnej zarjadowani:

Sobotu, 13. septembra, pokaza so w Praskim kinje film “Pola nas rěka wona Hanka”. Po tym maja wopytowarki a wopytowarjo składnosć, so z režiserku a protagonistami wuměnjeć. Wječor skulojći mj. dr. koncert skupiny Kula Bula, kotruž je prezidij Domowiny delegował. Njedźelu na to wotměje so na dworje Łužiskeho seminara hudźbne popołdnjo. Tež tu stara so mj. dr. skupina Kula Bula wo serbske zynki (dalše hlej plakat).

+++

Zetkanje młodych zastupjerjow mjeńšinow a rěčacych delnjoněmčiny

Wot 19.– 23. nowembra 2025 wotměje so w Budyšinje zetkanje za młodych přisłušnikow narodnych mjeńšin a rěčacych delnjoněmčiny. Wone měri so na zajimče a zajimcow mjez 18 a 35 lětami. Pod hesłom „Tradicija w transformaciji“ wočakuje wobdźělnikow wotměnjawy program z dźěłarničkami, wulětami a zetkanjemi kołowokoło rěče, politiki a kultury. Tež zhromadny wopyt schadźowanki je planowany.

Přizjewće so hač do 19. septembra: Anmeldung zum Vernetzungstreffen junger Minderheitenangehöriger und Plattsprechender 2025

+++

Terminy (wuběr) z protyčki 08.09. do 14.09.2025 

pjatk, 12.09.2025 

• 16.00 hodź. lětni swjedźeń kontaktneho běrowa Swobodneho stata Sakskeje w Praze, wobdźělitaj so čłonaj zwjazkoweho předsydstwa Beno Bělk a Joachim Glücklich 

• 18.30 Uhr wotewrjenje Sakskeje krajneje domchowanki na Łužiskim naměsće we Wojerecach, předsyda Domowiny Dawid Statnik so wobdźěli 

sobotu, 13.09.2025 

• 9.00 hodź. kongres Europasion w Chrósćican “Jednoće”, organizator: towarstwo Cyrila a Metoda z.t. Cyrill-Methodius-Verein e.V., předsyda Domowiny Dawid Statnik postrowi hosći

informacije a zastupne lisćiki namakaće pod: Pasion 2025 – Katolski Posoł