Dźensa bě delegacija Poradźowaceho wuběrka Europskeje rady za Ramikowe dojednanje za škit narodnych mjeńšin w Budyšinje pola Domowiny. Tak zetkachu so dwě čłonce a čłon z předsydu Domowiny Dawidom Statnikom, hłownej jednaćelku Judit Šołćinej kaž tež jednaćelom Marcusom Końcarjom, zo bychu so wo aktualnym połoženju serbskeho ludu informowali.

Čłonojo wuběrka maja nadawk cyłu šěrokosć temow ramikoweho dojednanja za wšitke štyri narodne mjeńšiny w Němskej posudźować: toleranca w towaršnosći, prašenja diskriminacije na polu rěče, kubłanja, medijow, zarjadnistwa, zjawneje dwurěčnosće kaž tež móžnosće wobdźělenja w ramiku politiskich rozsudow.

Domowina je w diskusiji mjez druhim kubłanje, medije, digitalizaciju, mjeńšinowu politiku kaž tež financowanje Załožby za serbski lud jako wužadanje do přichoda wuzběhnyła. Wosebje zajimowaše so gremij za politisku situaciju Serbow nastupajo prawicarstwa. 

Čłonojo gremija su cyły tydźeń w Němskej po puću, zo bychu šeste stejišćo z poručenjemi za Němsku přihotowali. Jako zastupjerka zajimow Serbow chwali sej Domowina wosobinsku rozmołwu z wuběrkom. Tak móža so aktualne wuwića za škit serbskeho ludu rozjimać a ze stron ekspertow Europskeje rady w jich rozprawje wobkedźbować.

Pozadk

Poradźowacy wuběrk za Ramikowe dojednanje za škit narodnych mjeńšin wobsteji po artiklu 26 z njewotwisnych wěcywustojnych, kotrychž woli Europska rada. Wuběrkej přisłuša 18 čłonow z připóznatej kompetencu na polu mjeńšinoweho škita/čłowjeskich prawow, kotřiž su stajnje na štyri lěta woleni. Z Němskeje je dr. jur. Detlev Rein čłon gremija.

Poradźowacy wuběrk Europskeje rady přihotuje za kóždy kraj, kiž je dojednanje podpisał, specifiske stejišća, kotrež so po wobšěrnym monitoringu přiwzaja. K tutomu słušeja přepruwowanje statnych rozprawow a druhich žórłow informacijow kaž tež zetkanja z knježerstwowymi partnerami, zastupjerjemi narodnych mjeńšin a dalšimi akterami. Po tutym přihotuje wuběrk stejišća z konkretnymi doporučenjemi za jednotliwe instancy, zo bychu so zwěsćene problemy rozrisali. Najaktualniši posudk je z lěta 2021. Tež za tutón je so Poradźowacy wuběrk mjez druhim z Domowinu wuměnił, zo by wo serbskich naležnosćach zhonił. 

Foto (Domowina/Božena Šimanec): Čłonce a čłon Poradźowaceho wuběrka za Ramikowe dojednanje za škit narodnych mjeńšin w rozmołwje z Domowinu.