Třiceći młodostnych mjez 17 a 28 lětami z Ukrainy, Georgiskeje a Němskeje je so štwórtk, 11.8., z Domowinu zeznajomiło. Madlena Di Sarnowa, referentka za naležnosće třěšneho zwjazka, je hosćom přehlad wo Serbach a jich narodnej organizaciji sposrědkowała a z nimi do stawiznow, struktury serbskich institucijow a gremijow, medijow a dźensnišich ćežišćow a wužadanjow Domowiny pohladnyła. Sonja Hrjehorjowa, regionalna rěčnica za teritorij župy „Handrij Zejler” Wojerecy, předstaji rěčnu situaciju, kubłanski system, pjeć župow, wšelake nałožki a konkretnu dźěławosć Wojerowskeje župy. Tež Hilžbjeta Pöpelec z Chrósćic, kotraž tuchwilu prózdninske dźěło pola Domowiny wukonja, rozprawješe na přikład wo serbskej wučbje na serbskim gymnaziju w Budyšinje.

Młodostni běchu jara zajimowani a su z wjele prašenjemi informacije dale pohłubšili. Organizatorka wuprawy bě mjez druhim Alexandra Kuring, pochadźaca z Pančic-Kukowa, tuchwilu studentka w Drježdźanach a čłonka předsydstwa towarstwa wost z.t. Partnerskej organizaciji stej organizaciji němskeje mjeńšiny w Georgiskej a Ukrainje. Wobdźělnicy projekta towarsta „wost” z Drježdźan wěnuja so 8. do 15. žnjenca (awgusta) temje „mjeńšiny a ćěkancy w Europje”, konkretnje statusej a situaciji mjeńšinow a ćěkancow w tutych třoch krajach. K tomu słušeja tež rozmołwy ze zastupjerjemi organizacijow migrantow a mjeńšinow. W Budyšinje su so tež w Serbskej kulturnej informaciji a w Smolerjec kniharni rozhladowali, jedna skupina wopyta Serbski muzej, druha serbski rozhłós MDR. Za měsac poda so skupina do Georgiskeje.

Wobraz: Sonja Hrjehorjowa a Madlena Di Sarnowa młodostnym z třoch krajow wo Serbach přednošowaštej. Foto: Hilžbjeta Pöpelec