Dźensa schadźowaše so prezidij Domowiny – předsyda Dawid Statnik, městopředsydka Marlis Młynkowa a městopředsyda dr. Hartmut Leipner – w Budyšinje na swoje prěnje posedźenje we wólbnej dobje, po konstituowanju.

Na dnjowym porjedźe steješe přihot 1. (rjadneho) posedźenja zwjazkoweho předsydstwa, kotrež budźe 13.06.25 we Wojerecach. Tak přihotowachu přitomni wjacore předłohi, kotrež ma zwjazkowe předsydstwo schwalić. Mjez druhim ma so jednanski porjad Zwjazkoweho předsydstwa Domowiny wobzamknyć. Dale maja so zastupjerjo w Poradźowacym wuběrku za prašenja serbskeho ludu poboku Zwjazkoweho ministerstwa nutřkowneho kaž tež w Mjeńšinowej radźe Němskeje pomjenować.

Dale je prezidij mj. dr. wo sćěhowacych delegowanjach rozsudźił:

Něhdyši brigadnicy podaja so z bywšim nawodu Friedemannom Böhme na swjedźenske zarjadowanje klóštra Hejnicy dnja 01.07.2025. Klóšter swjeći 300. róčnicu cyrkwinskeje swjećizny.

Dale je prezidij zastupjerjow serbskeje młodźiny na wuměnu młodych rěčnikow mjeńšinowych rěčow (HIGA) do Baskiskeje wot 05. do 08.07.2025 delegował. Konferenca ma zaměr, rěčnu mnohotnosć a rěčny aktiwizm spěchować.

Domowina deleguje Serbsku rejowansku skupinu Smjerdźaca z. t. na folklorny festiwal „MALTA International Folk Festival“ na kupje Malta (Italska) wot 24. do 26.10.2025. Skupina je wuraznje jako zastupjerka Domowiny a Serbow na tutón podawk přeprošena a chce tam serbsku ludowu kulturu na polu reje a spěwa z wotpowědnymi programami před mjezynarodnym publikumom prezentować.

Nimo toho podpěruje Domowina kulturnu wuměnu mjez sportowymaj towarstwomaj SJ Njebjelčicy a SJ Sokol Roztoky u Jilemnice, kotraž budźe 28. do 29.06.2025 w Njebjelčicach za čas Mjezynarodneho folklorneho festiwala “Łužica”.

Dalši tema bě powołanje referenta Pětra Brězana jako zastupjerja Serbow do stajneje přirady za turizm w Swobodnym staće Sakskeje w dobje 2025 – 2029. Nowa přirada bu w masterskim planje “Turizm Sakska” zapisana a poradźuje Sakske statne ministerstwo za wědomosć, kulturu a turizm při tym, zaměry masterskeho plana zwoprawdźić.