Na konferencu „Domoj do přichoda – wjacerěčna Łužica 2100: wizija. zamołwitosć. zhromadna syć“ je něhdźe 110 wobdźělnikow z wšelakich regionow Łužicy do Smochčanskeho kubłanišća swjateho Bena přichwatało. Při tym zaběrachu so zastupjerjo towarstwow, kubłanišćow, politiki a předewzaćeljo z tym, kak hodźi so serbska rěč zhromadnje sylnić a skrućić. 

Prof. dr. Nicole Dołowy-Rubińska konferencu z wědomostnym přednoškom „Wot wizije k akciji: kak rěčnu rewitalizaciju planujemy“ wotewri. Wona wuzběhny, „zo sej rěčna rewitalizacija aktiwne prócowanje wo změnu nastajenja ludźi, zesłabjenje škódnych rěčnych ideologijow a zesylnjenje rěčneje praksy w mjeńšinowej rěči žada.”

Złožujo so na wuslědki regionalnych dźěłarničkow wuzběhny dr. Cordula Ratajczakowa, nawodnica rěčneho slědźenja projekta ZARI, zo su wobydlerjo ze wšěch regionow wobćežowace nazhonjenja ze serbšćinu dožiwili, kotrež měli so hojić, zo móhli so ludźo ze serbskim herbstwom identifikować.

Předstajejo wuslědki Łužiskeho monitora podšmórny dr. Jörg Heidig wotewrjenosć a zajim ludźi, so za serbske naležnosće zasadźować, rěč nawuknyć a so z tradicijemi identifikować.

Na konferency so wobdźělnicy w pjeć dźěłarničkach ze wšelakimi aspektami, zapisanymi do akciskeho plana, zaběrachu. Dwurěčnosć na wšědnym dnju, widźomnosć serbšćiny a nowe poskitki wuknjenja rěče běchu ćežišća. Nimo fachowych impulsow a mnoho praktiskich přikładow skićeše konferenca tohorunja móžnosć so rozmołwjeć, diskutować a syće plesć.

Ze zhromadnym wuhódnoćenjom a wuhladom do přichoda so konferenca projekta ZARI wuspěšnje skónči. Wšako njeje wjacerěčnosć a skrućenje serbšćiny nadawk jednotliwcow, ale zhromadny projekt cyłeho regiona a akterow.