Na konferencu „Domoj do přichoda – wjacerěčna Łužica 2100: wizija. zamołwitosć. zhromadna syć“ přeprošuje projektowy team ZARI dnja 13. nowembra do Smochčanskeho kubłanišća swjateho Bena.

Zaměr konferency je sej wotkrywać, kak móžemy zhromadnje serbsku rěč sylnić, zo by so Łužica jako wjacerěčny region do přichoda skrućiła.

Wotběh

Jako impuls do dnja přednošuje prof. dr. Nicole Dołowy-Rybińska na temu „Wot wizije k akciji: kak rěčnu rewitalizaciju planujemy“. Zdobom so předstaja wuslědki dźěłarničkow w regionach, w kotrychž naši rěčni motiwatorojo skutkuja a wuslědk Łužiskeho monitora, kotryž pokazuje kak sylnje serbska rěč a identita ludźi zaběratej.

Na konferency so wobdźělnicy w pjeć dźěłarničkach ze wšelakimi aspektami, zapisanymi do akciskeho plana, tematisce zaběraja:

· Kak docpějemy dwurěčnu normalitu w towarstwach, předewzaćach, institucijach a w zjawnym žiwjenju?

· Kak móžemy prestiž a widźomnosć serbšćiny jako marki w kulturje, designje a hudźbje tež zwonka Łužicy prezentować?

· Kak sej serbske herbstwo wotkrywamy a zmóžnjamy nowy, načasny přistup k regionalnym stawiznam a kulturje?

· Kak hodźi so serbšćina nawuknyć? Kotre kursy so poskićuja a kotre dalše móžnosće wobsteja? Noworěčnicy rozprawjeja wo swojich nazhonjenjach.

· Interaktiwna dźěłarnička LISTEN - rěčny trening, kotryž ći pomha swoju rěčnu praksu reflektować a wotkryje móžnosće, serbsku rěč wšědny dźeń husćišo wužiwać.

Nimo fachowych impulsow a mnoho praktiskich přikładow skići wam konferenca rum so wuměnić, diskutować a syće plesć.

Zaměrowa skupina

Konferenca měri so na čestnohamtsce w towaršnosći a towarstwach skutkowacych, na kubłanišća, sobudźěłaćerjow a wjednistwa institucijow a firmow kaž tež na wjesnjanostow a radźićelow, na wšěch kotřiž chcedźa serbšćinu widźomnišu a słyšomnišu činić a kotřiž chcedźa, zo je Łužica wjacerěčna a pisana.

Witani su wšitcy, kiž serbsce rěča, kiž serbšćinu wuknu abo sej z mysličku hrajkaja ju nawuknyć.

Přizjewće so hač do 13. oktobra 2025 pod www.eveeno.com/686119683. Dalše informacije pod: Domoj do přichoda – zweisprachige Lausitz 2100 – Vision.Verantwortung.Vernetzung. - zari-domowina