Hižo tydźenja sobotu wopyta swj. Mikuláš (čěski swj. Mikławš) zhromadnje z jandźelom a čertom wjacore stacije w Serbach a wobradźi něhdźe 250 dźěćom słódkosće a chłóšćenki.

Wot wčerawšeho wopytatej čłonce Towarstwa přećelow Serbow z Prahi Eliška Oberhelová a Vladimíra Holmanová serbskich šulerjow w Budyšinje, Chrósćicach, Worklecach, Pančicach a Ralbicach.

W ramiku čěsko-serbskeho projekta je zaměr šulerkam a šulerjam čěske tradicije zbližić a zdobom přirodny čěsko-serbski rěčny rum zmóžnić. Tak paslitej Oberhelová a Holmanová na přikład klasiske debjenki za hodowny štom z parličkow, štož je w Čěskej zdobom nalistowane imaterielne kulturne herbstwo. Dale chcetej hosćej hišće typiske čěske recepty słódkosćow a poprjančkow zhromadnje ze Serbami wuspytać. Projekt spěchuje so ze srědkow Swobodneho stata Sakska na zakładźe wot zapósłancow Sakskeho krajneho sejma wobzamknjeneho etata.

Foto: Eliška Oberhelová