Mnozy hosćo zhladowachu minjenu sobotu, 20.09.2025, zhromadnje z předsydku Trjebinskeje Domowinskeje skupiny Angeliku Balccynej na 80 lět aktiwneho towarstwoweho žiwjenja.

Zbožopřeća sposrědkowachu wjesnjanosta Trjebinskeje gmejny Robert Sprejz, zamołwita za serbske naležnosće Zhorjelskeho wokrjesa Kati Struckowa a županka župy Jakub Lorenc-Zalěski z.t. Diana Maticowa. Nimo toho přidružichu so gratulacijam mnoho zastupjerjow župje přisłušacych towarstwow a dalši hosćo.

Za čas swjedźenskeje narěče předsydy Domowiny Dawida Statnika počesći so Angelika Balccyna za swój njesprócniwy angažement jako předsydka Trjebinskeje wjesneje skupiny ze "Serbskim dudakom". Hižo 58 lět je wona aktiwna čłonka Domowinskeje skupiny a wot 2005 jeje předsydka.

Serbski folklorny ansambl Slepo z.t. zarjadowanje wobrubi.

Diana Maticowa, županka župy Jakuba Lorenca-Zalěskeho z.t.

Foto (Diana Maticowa): zamołwita za serbske naležnosće Zhorjelskeho wokrjesa Kati Struckowa, předsydka Domowinskeje skupiny Trjebin Angelika Balccyna, předsyda Domowiny Dawid Statnik, županka župy Jakuba Lorenca-Zalěskeho z.t.Diana Maticowa (wotlěwa)