Na swoje prěnje a konstituowace posedźenje po 18. hłownej zhromadźiznje je so prezidij Domowiny dnja 16.05.2017 we Wojerecach zetkał. Prezidijej přisłušeja nimo předsydy Domowiny Dawida Statnika, městopředsydaj Marko Hančik a Wylem Janhoefer, kaž tež čłonaj Zwjazkoweho předsydstwa Judith Wałdźic a Marcel Brauman. W srjedźišću posedźenja stejachu přihoty přichodneho posedźenja Zwjazkoweho předsydstwa Domowiny, kotrež wotměje so 02.06.2017 w klubowni Delnjoserbskeho internata w Choćebuzu.Tohorunja zaběrachu so čłonojo gremija z namjetami za delegowanja a kulturne wuměny. Tak podpěruja lětsa nimo wšitkich dotalnje hižo rozsudźenych tež  kulturnu wuměnu młodostnych Sinti a Roma ze Serbami, wobdźělenje TCM na konferency Europassion w Madźarskej a wobdźělenje Serbskeho muskeho chóra Delany na dnju Saksow w Lubiju. Fonds za kulturne wuměny a delegowanja je z tym za lěto 2017 wučerpany. Požadanja su hakle zaso za spěchowansku dobu 2018 móžno.Dale informowachu so čłonojo prezidija wo rozsudźe hłowneho wuběrka Braniborskeho krajneho sejma. Po tym, zo bě Serbska rada w zašłym lěće 33 próstwow wo pruwowanje přisłušnosće komunow k serbskemu sydlenskemu rumej stajiła, přisłuša po rozsudźe hłowneho wuběrka nětko 43 gmejnow a městow serbskemu sydlenskemu rumej w Braniborskej. Prezidij dźakuje so wšěm čestnohamtsce a hłownohamtsce skutkowacym, kotřiž su so za tutón stawiznisce wažny rozsud zasadźeli, wosebje  Serbskej radźe, župje Delnja Łužica, regionalnemu běrowej Domowiny w Choćebuzu a ministerstwu za wědomosć, slědźenje a wuměłstwo. Zdobom wobžaruja čłonojo negatiwny rozsud k městu Luboraz, wočakuja pak, zo so šulski poskitk serbšćiny dale zdźerži.