Hinweis: Die Terminübersicht ist nur auf Sorbisch verfügbar – Sie können den Text aber ganz einfach mit dem Online-Übersetzer sotra.app ins Deutsche übersetzen lassen.
Pjatk, 25.09.26 wuradźowachu čłonojo Zwjazkoweho předsydstwa Domowiny na gmejnje w Chrósćicach. Nimo čłonow a poradźowarjow gremija je posedźenje tež hosći přiwabiło. Diskusiju wuwabichu wólby serbskich zastupjerjow ze Sakskeje do Załožboweje rady. Wažne čłonam gremija je, dobrych a fachowje kmanych kandidatow a kandidatkow namakać, kiž maja chwile tež w dźěłowym času so na posedźenjach rady wobdźěleć. Wólby wotměja so na přichodnym posedźenju zwjazkoweho předsydstwa. Hač do 30.10. móža serbske zjednoćenstwa namjety za kandidatow w zarjedźe Domowiny zapodać.
Zwjazkowe předsydstwo je mjez druhim nowy wuběrk wutworiło, zo by zhromadnosć mjez Delnjej a Hornjej Łužicu lěpje hajiło. Dotalni čłonojo su Franciska Albertowa, Dawid Statnik a Bjarnat Cyž. Dalši čłonojo su lubje witani a móža so w zarjedźe Domowiny rady přizjewić.
Aktualna situacija župy “Michał Hórnik” Kamjenc
Županka Diana Wowčerjowa rozprawješe wo aktualnej situaciji w župje. Župa ma 1.615 čłonow, kotrež angažuja so we wjesnych towarstwach, Domowinskich skupinach, hudźbnych ćělesach, kulturnych skupinach. Kaž županka Diana Wowčerjowa rozprawja, su w minjenjomaj lětomaj mnoho projektow a zarjadowanjow přewjedli.
Jedne z koncepcionalnych ćežišćow předsydstwa je zasadne wusměrjenje swojeje dźěławosće. Tak chcedźa swojich čłonow skerje w swojich projektach podpěrować, mjenje župnych projektow přewjesć. Nimo toho zaběraja so z prašenjom, kak móža Serbow we wšelakich kónčinach župy bóle podpěrować.
Županka přeprošuje nimo toho na winowy a spěwny swjedźeń, kotryž budźe 3.10.2026 w Pěskecach. Za klětu přihotuja nětko hižo 150. róčnicu załoženja lajskeho dźiwadła kaž tež 50. jubilej serbskeho lajskeho dźiwadła w Chrósćicach.
Dźěławosć Rady Załožby za serbski lud w dobje 2023-2027
Předsyda Marko Kowar rozprawješe wo dźěławosći Załožboweje rady. Legislaturna perioda so na kónc chila. Z tuteje periody ma gremij asistentku w zarjedźe, “štož přinošuje wěstej kwaliće”, tak Marko Kowar. Jedna tema rady bě přihot pjateho financneho zrěčenja. Dale je so jim radźiło, wjetšinu z lěta 2023 wobmjezowanych dźěłowych městnow do njewobmjezowanych změnić. Twarske předewzaća na Lawskim arealu w Budyšinje so lětsa tohorunja započinaja. Symboliski zaryw budźe 7.10.2026 w přitomnosći ministerskeho prezidenta Sakskeje a projektowych partnerow. W tutej legislaturnej periodźe je so nimo toho poradźiło, w Ludowym nakładnistwje Domowiny nowe mzdowe tarify zawjesć. Dalše temy rady běchu strukturne srědki, digitalizacija a změna spěchowanskich směrnicow.
W decembrje wola čłonojo zwjazkoweho předsydstwa serbskich zastupjerjow ze Sakskeje do Załožboweje rady za nowu wólbnu dobu 2027 – 2031. Nastupajo wobšěrneje dźěławosće mějachu pjatk tójšto prašenjow. Bjarnat Cyž namołwja tuž: “Pytamy ludźi, kiž maja nazhonjenje, maja serbsku dušu a wědźa wo zamołwitosći.”
Za wólby do rady je zwjazkowe předsydstwo slědowacy wólbny wuběrk powołało: Křesćana Korjeńka, Heike Apeltowu a Lorenca Krauße.
Noworjadowanje serbskeho sydlenskeho ruma w Braniborskej
Jednaćel Marcus Końcaŕ zjima sudniske jednanja, kotrež su so w minjenych lětach w Braniborskej přewjedli nastupajo noworjadowanja serbskeho sydlenskeho ruma w Braniborskej. “Skoro wšitke sudniske jednanja su rozsudźene”, tak Końcaŕ. “Hač na jedyn pad njebě žanoho znapřećiwjenja.” Dale wón wuwjedźe: “Jako Domowina z komunami a gmejnami hromadźe dźěłamy a jich podpěramy. Naša pozicija je, zo chcemy do přichoda hladać. Argumentacije su byli zdźěla ranjace Serbam napřećo. Ale nam njepomha w tutym padźe do zašłosće hladać, ale doprědka.”
Serbska rejowanska skupina Smjerdźaca do Awstralskeje
Beno Jurk předstaji zwjazkowemu předsydstwu wosebitu próstwu rejowanskeje skupiny. Towarstwo Wendish Heritage Society přeprošuje Serbsku rejowansku skupinu Smjerdźaca wot 14.-26.10.2027 do Awstralskeje na “tydźeń serbskeje kultury”. Zwjazkowe předsydstwo jězbu podpěruje a skupinu deleguje. Z tym móža so maksimalnje 20.000 euro za wudawki za transport spěchować.
Wutworjenje wuběrka: Hornja a Delnja Łužica – zhromadnosć po cyłej Łužicy
W januarje je zwjazkowe předsydstwo přewjedło internu klawsuru. Tuta słužeše tomu, mysle čłonow zběrać wosebje wo swójskej dźěławosći jako gremij. Mnoho nastorkow su čłonojo zarjadej Domowiny sposrědkowali. Z tutych je zarjad naprawy wotwjedł, kotrež so do krótko- resp. dołhodobnych rozrjaduja. Někotre z krótkodobnych so hižo realizuja. Na přikład wuleža na kóždym posedźenju zwjazkoweho předsydstwa aktualne materialije a wudaća Rěčneho centruma Witaj a Domowiny. Dalša tema je komunikacija mjez zarjadom a gremijom, mjez čłonami abo na přikład z młodej generaciju, kotraž je digitalnje po puću.
Jedna tema, kotraž je z tuteje diskusije wurostła, je hajenje zhromadnosće mjez Delnjej a Hornjej Łužicu. Wjetšina čłonkow a čłonow je so za to wuprajiła, wutworić dźěłowy wuběrk, kotryž konkretne temy, kaž na přikład zhromadne projekty abo mjezsobnu wuměnu, spěchuje. Prezidij je tuž proces přihotował aa pjatkownišim posedźenju je so wuběrk wutworił. Prěni čłonojo su Franciska Albertowa, Dawid Statnik a Bjarnat Cyž. Dalše zajimcy móža so w přichodnych tydźenjach přidružić.
Ze stron zarjada budźe referent Clemens Škoda wuběrk podpěrować.
Dalše wobzamknjenja
Zwjazkowe předsydstwo je kluč delegatow za 24. hłownu zhromadźiznu, kotraž budźe 2027 w Brětni, schwaliło. Nimo 26 čłonow zwjazkoweho předsydstwa maja župy kaž tež čłonske towarstwa a zwjazki na kóžde započane 140 čłonow jednoho delegata nominować, mjeńše towarstwa maja prawo na dweju delegatow.
Zwjazkowe předsydstwo je wotličenje hospodarskeho lěta 2025 na wědomje brało, kotrež je jim Matej Wałda w mjenje zarjada Domowiny pjatk předstajił.
Nimo toho je Zwjazkowe předsydstwo Domowiny přihłosowało naćiskej hospodarskeho plana za lěto 2027 a wozmje zaměrowe dojednanja za 2027 na wědomje. Prezidij je dóstał nadawk, z pomocu zarjada Domowiny wužiwanje srědkow w lěće 2027 běžnje kontrolować.
Wot 01.10.2026 budźe Marija Budarjowa Serbski folklorny ansambl Wudwor w přihotowanskim wuběrku za Mjezynarodny folklorny festiwal „Łužica – Łužyca” zastupować. Dotal skutkowaše w tutym Błažij Handrik. Zwjazkowe předsydstwo so jemu za jeho wutrajne a jara aktiwne sobudźěło we wuběrku, ale tež pola Wudworčanow wutrobnje dźakuje.
Syman Hejduška swój mandat w zwjazkowym předsydstwje złoži. Přičina je, zo je w mjezyčasu přistajeny pola Domowiny a njemóže tuž runočasnje w gremiju skutkować. Wón běše delegowany za Zwjazk serbskich wuměłcow.
