• zakonski zastupjer Domowiny
• moderěruje rozdźělne měnjenja serbskeho ludu a konsoliduje jeho zajimy
• zamołwity za zwoprawdźenje nadawkow, kotrež wuchadźeja z wobzamknjenjow hłowneje zhromadźizny a zwjazkoweho předsydstwa – na zakładźe wustawkow, programa a dźěłowych směrnicow Domowiny
• nawod wuradźowanjow zwjazkoweho předsydstwa a prezidija
• nawod wuradźowanjow z předsydami čłonskich towarstwow
• nawod wuradźowanjow z nawodnistwami serbskich institucijow
   

Zastupuje Domowinu:

• w Mjeńšinowej radźe štyrjoch awtochtonych narodnych mjeńšin a ludowych skupin Němskeje
• w Poradźowacym wuběrku za prašenja serbskeho ludu při zwjazkowym ministerstwje nutřkowneho
• we wjacorych wuběrkach Domowiny
• w dohladowanskej radźe Čornochołmčanskeho Krabatoweho młyna ptzwr, městopředsyda
• w Sakskim krajnym wustawje za priwatny rozhłós a nowe medije (SLM), předsyda
   

Čestnohamtski angažement:

• župa „Michał Hórnik“ Kamjenc, Zwjazk serbskich wuměłcow, Serbske šulske towarstwo, Towarstwo Cyrila a Metoda a Serbske młodźinske towarstwo „Pawk“
• Rada za serbske naležnosće Swobodneho stata Sakskeje, předsyda
• čłon wokrjesneho sejmika Budyšin
• poradźowacy čłon w kulturnym konwenće Hornja Łužica-Delnja Šleska

“Widźu dwurěčnosć Łužicy, hdźež su Serbja připóznaty a runoprawny lud na wšelakich runinach, jako realizujomnu wiziju.“

“Po mojim měnjenju njeje trjeba, přeco něšto změnić. Chcu rady to wobstejace dale zaručić.”

“Chcu ze swojim angažementom něšto přinošować na dobro Serbow. Sym hižo wjele nazhonjenjow zběrał, kotrež chcu z młódšej generaciju dźělić.”

“Z mojeho wida je najwažniša tema wožiwjenje a spěchowanje serbskeje rěče, z tym zwjazane rozrisanje problemow serbskeho šulstwa.”

“Myslu, zo je serbska rěč – zachowanje, dalewuwiwanje a posrědkowanje – najwažniša tema za naš lud. Rěč je kluč k tradicijam, nałožkam a ludźom.”

“Serbskosć mojeje domizny mi jara na wutrobje leži. W Domowinje mam dobru móžnosć sobu přemyslować. Nochcu jenož přihladować.”

“Do towaršnostnych procesow zapřimnyć móc, narodne wuwiće přewodźeć, to wobhladuju jako wobohaćenje mojeho žiwjenja.”

“Widźu wulke šansy w digitalizaciji, strukturnej změnje a w regionalnym wuwiću. Chcu so wo to prócować, zo so na tutych polach dale wuwiwamy.”

“Najwažniše temy za serbski lud su po mojim měnjenju: serbska identita – dorost a rěč.”

“Nimo podpěry za młode serbske swójby abo wabjenja za jich nawrót do Łužicy, měli so tež serbsce wuknjacy z wosebitymi naprawami podpěrać, zo móhli woni našu rěč spěšnišo a efektiwnišo nawuknyć.”

“Za mnje najwažniši nadawk našeho časa je, wosebje w Delnjej Łužicy serbsku rěč a identitu zaso do wšědneho dnja zaplesć.”

“Moja wizija je, zo je serbšćina dominowaca rěč we wšitkich serbskich kubłanišćach – wot pěstowarnje hač do wyšeje šule abo gymnazija.”

“Po mojim měnjenju je serbska rěč to najwažniše a naprawy na dobro tuteje. Tak měli so na přikład šule skrućić, ale tež starši.”

“Jako młody Serb bych rady dał nowe impulsy do zwjazkoweho předsydstwa, kiž polěkuja modernišemu zrozumjenju serbskeje identity a politiki.”

“Je wažne, so za Serbow zasadźować, nas na politiskej runinje skrućić a přiběracej namocy přećiwo Serbam znapřećiwjeć.”

“Na kóncu je najwažniše, zo kóždy Serb spóznaje, kotru bohatosć poprawom z našej rěču mamy a tute wědomje přichodnej generaciji dale da.”

“Chcu so w zwjazkowym předsydstwje za zajimy serbskeje młodźiny zasadźować a jeje hłós być.”

„Chcu přinošować k mjeńšinowemu škitej a diwersnej towaršnosći.“

“Jeli wšo derje běži, sej serbski sydlenski rum w lěće 2100 zdźeržimy, skrućimy a dale wutwarimy. Serbska rěč je žiwa a to nic jenož na papjerje.”

“Serbskosć – Serbow widźomnje prezentować: My tu tež smy a za to wabić, so tež we wšědnym dnju w zawodach jako Serbowka abo Serb wuznawać.”

“Serbska rěč je mi jara wažna. A tak tež wšitko, štož z tutej zwisuje: kubłanje – wot žłobika, pěstowarnje, šule hač do powołanskeje šule, atd.”

“Serbska rěč słuša do wšědneho dnja a naš serbski sydlenski rum ma dale w swojej wulkosći wobstać. Ludźo, kotřiž tam bydla, su hordźi Serbja.”

“Po mojim měnjenju je prezenca serbskeho ludu w zwjazku wažna – zo jako jedyn lud wustupujemy.”

“Moja wizija je: Serbja su připóznaty a runoprawny lud na wšitkich runinach; hdźež ma kóžde dźěćo šansu na dobre kubłanje a móže serbsku rěč nawuknyć.”

“Chcu so dale prócować wo wuspěšne rozrisanje wužadanjow na polu serbskeho šulstwa a kubłanja.”

“Dyrbimy so jako Serbja prócować našim dźěćom prawu a čistu serbšćinu sposrědkować, zo by wona dale wobstała.”