Domowina w rozmołwje z krajnym radu

Budyšin. Předsyda Domowiny, Dawid Statnik a jednaćelka Judit Šołćina zetkaštaj so dźensa popołdnju na rozmołwu z krajnym radu wokrjesa Budyšin Udo Witschasom. W srjedźišću stejachu nadawki wokrjesa Budyšin, kotrež wuńdu z wustawkow k zachowanju, spěchowanju a wuwiću serbskeje rěče a kultury we wokrjesu Budyšin.
„Wustawki wokrjesa pomjenuja jasnje zasady k zaručenju, škitej a spěchowanju prawow staćanow serbskeje narodneje přisłušnosće a zachowanje jich identity kaž tež hajenje a wuwiwanje jich rěče, kultury a daledawanja. Wažne je, zo so tutón daty prawniski ramik tež w praksy nałožuje a zwoprawdźa.“, tak Judit Šołćina.
W rozmołwje tematizowana bu tež najmłódša rozprawa wo stawje zeskutkownjenja wustawkow, kotraž bu w zašłym wokrjesnym sejmiku předstajena. Tuta předstaja dźěławosć wokrjesa we wšelakich zarjadach a swójskich zawodach.
Zastupjerjej Domowiny narěčeštej konkretne wužadanja Serbskeho muzeja Budyšin, kotryž je w nošerstwje wokrjesa, składnostnje planowaneho přećaha do Serbskeho foruma wědy při Lawskim arealu. Dale tematizowaštej wužiwanje serbskeje rěče w zjawnym wosobowym bliskowobchadźe a skutkowanje dźěłoweho kruha za serbske naležnosće.
K tomu wuwjedźe Dawid Statnik: „Wokrjes Budyšin je nam wažny partner při zachowanju a pěstowanju serbskeje rěče a kultury. To pak njeje samozaměr, ale praktiske přesadźenje wustawoweho wobkedźbowanja serbskich zajimow.“
Udo Witschas wuzběhny wažnosć serbskich naležnosćow. „Za mnje jako krajny rada a jako wobydler wokrjesa je naša dwurěčnosć něšto wosebite. Žiwa serbska kultura a rěč stej znamjo jónkrótnosće našeho wokrjesa. Tu widźimy so we winowatosći, tute podpěrać a spěchować. Tuž dźakuju so Domowinje za móžnosć direktneje wuměny k aktualnym temam.“ W rozmołwje dojednachu so přitomni na prawidłownu wuměnu mjez Domowinu a krajnym radu.