“Žadamy sej jasne rjadowanja a podpěru”

Z wulkej starosću bjerje Domowina aktualne wuwiće wokoło šulstwa na wědomje. Starši a dźěći trjebaja wěstotu a spušćomnosć runje tak kaž wučerki a wučerjo. Domowina zasadźuje so tohodla za zarjadowanje rjadownjow kaž je so staršim do spočatka lěćnych prózdnin přilubiło.

“Smy mjez druhim w rozmołwje ze staršimi, za kotrychž dźěći je so připowědźena zestawa swojeje rjadownje w 1. lětniku na Radworskej Serbskej zakładnej šuli krótko do spočatka noweho šulskeho lěta změniła. Kultusowe ministerstwo Sakskeje a Krajny zarjad za šulu a kubłanje žadatej sej wot šulskeje wjednicy změny. Našu podpěru smy staršim kaž tež šulskemu wjednistwu přilubili.”, tak kubłanska referentka Katrin Suchec-Dźisławkowa. Zhromadnje ze Serbskim šulskim towarstwom je so zastupjerka Domowiny na wčerawšej šulskej konferency z poradźowacym hłosom wobdźěliła.

Tuchwilu dźěłatej towarstwje na wotpowědnych zakładach za jasne rjadowanja a zawjazowace předpisy za serbsku wučbu w šulach.

“Sym zludany, zo so naše dotalne postupy w serbskim šulstwje nětko prosće ignoruja. Wojujemy pak dale za naše serbske šule.”, tak předsyda Domowiny Dawid Statnik. Dale wón wuwjedźe, zo “je za šule dźeń a ćešo, wučbu po „2plus“-koncepće přewjesć. Koncept njeje zakońsce zakótwjeny. Faluja tu jasne rjadowanja. Tole wjedźe k rozestajenjam, njedorozumjenjam a wumjetowanjam.”