Drasta ewangelskich Serbow we Wojerowskim regionje

W měsće Wojerecy sej serbsku ewangelsku drastu zdrasća, w Němcach pak katolsku drastu.

Do Wojerowskeho drastoweho regiona słušeja 28 sydlišćow. W regionje nosy so přewažnje ewangelska drasta. Burja běchu hospodarsce słabši hač w druhich kónčinach. Póda bě hubjena a wunoški z polow snadne. Nimo toho wudobywanje brunicy pódźe dnownu wodu sćaza. Něhdy skerje chuduške žiwjenske wuměnjenja w tutej kónčinje tež drasta wotbłyšćuje. Přirunujo z druhimi drastami je wona jednoriša. Jasne, sylne barby lanych a wołmjanych płatow spožča drasće swój njezaměnliwy raz. 
Typiske za njedźelsku a swjedźensku drastu holcow a młodych žonow su:

• oranžojta hornja suknja,
• židźana čorna měca ze seklemi w tyle a jenak formowana běła tylowa (zdźinowa) hawba za holcy 
• smužkata mustrowana fala a
• muslinowe rubiško.

Spódnja drasta je pola wšitkich wariantow narodneje drasty samsna:

• tołsta watěrowana suknja (z tym dósta hornja suknja formu zwonojteje suknje)
• jednora běła spódnja suknja
• běła bluza (kitlik)

Drohotne wozdebjenki běchu za ludźi w holanskich kónčinach předrohe, tohodla drastu ze škleńčanymi parličkami a zybolenkami wudebichu. 
Za to pak wuměłsce wušiwane dźěle drasće wosebity raz spožčeja. Wulkotne křižne a dźěrkowe wušiwanki nastawaja w sporym dźěle. Na přikład žadaše sej wušiwanje swjedźenskeje fale wjacore sta hodźin sćerpneho dźěła. 

Muska drasta so w 19. lětstotku němskej drasće připodobnješe. Najdlěje je so dołhi módry płašć z čerwjenym podšićom a błyšćatymi kneflemi zdźeržał. Cholowy, lacy, kabaty abo módra lacowa fala so jako dźěłanska drasta hišće dołho wužiwachu. 

Swjedźenska drasta je mnohotna a ma swoje regionalne wosebitosće. Dohromady mamy něhdźe 60 wariantow drasty, štož pokazuje so mj. dr. w nahłownej pyše za njewjestu a družkow. 

K wosebitym składnosćam, kaž k wjesnym swjedźenjam, mejemjetanju, domizniskemu dnjej abo na  Božej mši k domchowance wuhladamy wjac a wjac dźěći a młodostnych w swjedźenskej a kemšacej drasće.  Tež chóry a rejwanske skupiny wšelakorosć narodneje drasty při swojich wustupach prezentuja.