Drastwa ewangelskich Serbow we Wórjejskem regionje

W měsće Wórjejce sebje serbsku ewangelsku drastwu woblekaju, w Nimcach pak katolsku drastwu.

Do wórjejskego drastwowego regiona słuša 28 sedlišćow. W regionje nosy se pśewažnje ewangelska drastwa. Burja su byli góspodaŕski słabše ako w drugich stronach. Zemja jo była špatna a wunoski z pólow snadne. Mimo togo wudobywanje brunice zemi spódnu wódu wuśěgujo. Něga skerjej chudobne žywjeńske wuměnjenja w toś tych stronach teke drastwa wótbłyšćujo. Pśirownujucy z drugimi drastwami jo wóna jadnorjejša. Jasne, mócne barwy lanych a wałmjanych suknow pósćiwaju drastwje swój njezaměnliwy raz.

Typiske za njeźelsku a swěźeńsku drastwu źowćow a młodych žeńskich su:

• oranžojta zwjerchna kóšula,
• žyźana carna mica ze šlejfami w tyle a jadnak formowana běła tylowa (žyźana) hawba za źowća,
• smužkata mustrowana šorca a
• muslinowe rubiško.

Spódna drastwa jo pla wšyknych wariantow narodneje drastwy samska:

• tłusta watěrowana kóšula (z tym jo dostała zwjerchna  kóšula formu zwónojteje kóšule),
• jadnora běła spódna suknja,
• běła bluza (kitlik).

Te drogotne wupyšnjeńki su byli za luźi w gólańskich stronach pśedroge, togodla su drastwu ze głažanymi parlickami a libotkami wupyšnili.
Za to pak wuměłski wušywane źěle drastwje wósebny raz pósćiju. Wjelicne kśicne a źěrkowe wušywanki nastawaju w spórem źěle. Na pśikład jo pominałoł wušywanje swěźeńskeje šorce někotare sta góźin sćerpnego źěła.

Muskeska drastwa jo se w 19. stolěśu nimskej drastwje pśipódobniła. Nejdlej jo se dłujki módry płašć z cerwjenym pódšyśim a błyšćatymi bublinami zdźaržał. Zec, lacy, kabaty abo módra lacowa šorca su se ako źěłańska drastwa hyšći dłujko wužywali.

Swěźeńska drastwa jo wjeleseraka a ma swóje regionalne wósebnosći. Dogromady mamy něźi 60 wariantow drastwy, což pokazujo se mjazy drugim w kšasnosći za njewjestu a družki.

K wósebnym góźbam, ako k wejsnym swěźenjam, pušćanjeju majskego boma, domowniskemu dnju abo na namšy k domchowance wuglědamy wěcej a wěcej źiśi a młodostnych w swěźeńskej a namšaŕskej drastwje. Teke chory a rejowańske kupki wjeserakosć narodneje drastwy pśi swójich wustupach prezentěruju.