Spočatki serbskeje wubranki

Wubranych koparjow k sylnemu mustwu forměrować – z tutej myslu zaběrachu so w serbskej Łužicy hižo tehdom, jako so koparske towarstwa w třicetych lětach 20. lětstotka załožowachu. Hižo 1933 wotmě so we Worklecach hra mjez A- a B-wubranku, kiž so ze 4:5 skónči. Po II. swětowej wójnje dóńdźe 1956 k třom přećelskim hram „wubrankow“, při čimž mustwo hrajerjow SZ Hórki, Traktora Ralbicy a Traktora Pančicy-Chrósćicy składnostnje serbskeho festiwala přećiwo delnjoserbskej wubrance z Choćebuza na Młynkec łuce w Budyšinje 3:2 doby. 1965/66 slědowachu štyri dalše hry, mjez druhim tež dwě přećiwo čěskim přećelam TJ Spálené Poříčí. W slědowacych 20 lětach pak hižo nichtó wo zestajenju koparskeho mustwa „serbskeje wubranki“ njerěčeše. Hakle w meji 1986 organizowaše tehdyši trenar a pozdźiši wjednik koparskeho wotrjada SZ Chrósćicy Jan Macka wubranku, kotraž přećiwo amtěrowacemu wokrjesnemu mištrej Traktorej Halštrow 5:1 doby a kiž w awgusće samsnoho lěta na poswjećenju Chróšćanskeho trawnika přećiwo SB Ramnow (wobwodna klasa) kedźbyhódne 3:3 docpě. Tute aktiwity běchu pak stajnje swójske iniciatiwy, za kotrež dyrbjachu so kóšty ze swójskeje kapsy zwjesć.

Po politiskim přewróće bě so aktiwist sporta Jan Macka hišće raz wo to prócował, serbsku wubranku zestajeć, a to wuspěšnje. W juniju 1995 so poradźi, najsylnišich hrajerow sportowych towarstwow w Serbach do mustwa zjednoćić. W testowanskej hrě přećiwo Motorej Wulka Dubrawa, kotryž tehdy we wobwodnej klasy hraješe, dobychu Serbja suwerenje 5:1. Dnja 24.06.1995 dobychu najlěpši koparjo serbskich towarstwow nad čěskim mustwom Sokol Ovčary – teamom wobwodneje ligi – w oficialnej hrě w Chrósćicach 5:2. Tutón datum wobhladuje iniciator Jan Macka jako poprawny datum załoženja serbskeje wubranki „noweho časa“, wšako nětko tež Domowina - Zwjazk Łužiskich Serbow z.t. na přikład oficialnje jerseye a pjenježne srědki za přewjedźenje hrow wubranki poskići. Z toho časa wotměwachu so přećelske hry serbskeje wubranki prawidłownje. Hraješe so přewažnje w Chrósćicach a Njebjelčicach. Hry přećiwo dalšim mustwam z wukraja so přidružichu, kaž na přikład z 3. ligi mustwa z Hlučína (Čěska), Namysłowa (Pólska) a Ladanybene (Madźarska). FSV Budissa Budyšin bě wot 1999 sem prawidłownje jónu wob lěto z přećiwnikom w beneficnych hrach w Chrósćicach. Tole běchu předewšěm iniciatiwy Serbskeho Sokoła a Towarstwa Cyrila a Metoda, kiž stej tež z čłonom třěšneho zwjazka Domowiny.

Přihot a přewjedźenje I. EUROPEADY w Šwicarskej 2008 bě za serbsku koparsku wubranku wulka hrajerska motiwacija a spožči jej nowy image jako pósłanc Łužiskich Serbow. Bě jej wulka česć, jako hosćićelske mustwo zhromadnje z Domowinu - Zwjazkom Łužiskich Serbow z.t. a FUEN, Federalistiskej uniju europskich narodnych skupin, 19 mustow z cyłeje Europy dnja 16.6.2012 we Łužicy powitać.

 

Hornjoserbska wubranka přećiwo wubrance Traktora wobwoda Choćebuz na Zjězdźe Serbow 1956 w Budyšinje - Młynkec łuka (kónčny rezultat 3 : 1)
stejo wot prawa w běłych cholowach spóznajemy: Pawoła Čóšku, Jurja Nowaka, Franca Lejnarta, wrotarja Feliksa Pjetaša, Mikławša Krawca, Feliksa Statnika (schileny), Reinharda Kawša a Pawoł Nowak (na wobrazu njejsu widźeć: Pawoł Šołta, Jan Dórnik, Lejnik a Narćik)

Serbska wubranka 1965 pola TJ Spalene Pořiči (kónčny rezultat 3 : 3)
st. z lěwa: Jurij Bjenš, Pětr Neter, Jan Domaška (wšitcy Traktor Ralbicy), Rudi Rjenč (Traktor Pančicy - Chrósćicy), Ludger Wilsmann, Norbert Rewjerk, Alojs Šwon (wšitcy SJ Hórki)

kl. z lěwa: Pawoł Čóška, Feliks Šołta, wrotar Jan Hrjehor (wšitcy Tr. Ralbicy), wrotar Jurij Cyž (Tr. Pančicy - Chrósćicy), Józef Šwon, Jurij Kocor (wobaj SJ Hórki)

Wubranka serbskich koparskich mustwow Kamjenskeje 1. wokrjesneje klasy - SJ Ramnow (kónčny rezultat 3 : 3), dnja 14.08.1986 w Chrósćicach składnostnje přepodaća noweho sportnišća
st. wot lěwa, trenar Jan Macka, Michał Měrćink, Olaf Thiele, Křesćan Jakubaš, Bjarnat Šibšik, Joachim Hojer, Jan Mark, Rajner Hejduška, Andreas Kral, co - trenar Stefan Rjeda
kl. wot lěwa, Pětr Bejmak, Gerat Hrjehor, Měrćin Pjetaš, wrotar Křesćan Cyž, wrotar Józef Woko, Pětr Brankačk, Křesćan Korjenk a Herbert Wagner

Große Prämiere am 24. 06. 1995 zum I. Folklorefestival " Łužica " in Crostwitz gegen die Bezirksligamannschaft von Sokol Ovčary aus der Tschechischen Republik, Endresultat 5 : 2
von rechts: Sportlicher Leiter Johannes Matzke, Übungsleiter Alfons Matka, Michael Werner, Bernhard Schiebschick, Roman Koreng, Klemens Betka, Andreas Rachel, Michael Scholze, Michael Domsch, Heiko Sende, Roman Nawka
kniend von rechts: Alfons Mechela, Frank Rietschel, Enrico Schneider, Uwe Matzke, Thaddäus Ziesch, Marko Ziesch, verdeckt vom Linienrichter Andreas Krautschick, Peter Böhmak