Myto Arnošta Muki wupisa so za studentow a studentki resp. za absolwentow a absolwentki w prěnim lěće po zakónčenju studija na polu serbskeje rěče a literatury, sociologije, pedagogiki/didaktiki, serbskich stawiznow, serbskeho kulturnego slědźenja, wuměłstwa abo žurnalizma. 

Předsydstwo Maćicy Serbskeje wupisa Myto Arnošta Muki na lěto 2025 za wědomostne dźěło na polu rěče a literatury, sociologije, pedagogiki/didaktiki, stawiznow, kulturneho slědźenja, wuměłstwa, žurnalizma (a podobne) Serbow (zakónčene abo zakitowane 2024 a 2025). Jako myto wupisa Maćica Serbska 500 eurow za najlěpše zapodate dźěło. Hdyž je tute w serbskej rěči napisane, zwyši so myto na 700 eurow. Na wupisanju wobdźělić móža so studenća a studentki kaž tež absolwenća a absolwentki w prěnim lěće po zakónčenju studija.

Dźěłi dyrbjało měć znajmjeńša 35 stronow wobjima (połdralinkowski tekst w 12 pt. TimesNewRoman). Ilustracije su jako přidawk witane. Zapodać smě so tež hišće njewozjewjene dźěło, kotrež je nastało za akademiske zaměry. Dźěłu ma być připołoženy list, w kotrymž steji mjeno awtora/awtorki, adresa, narodny dźeń, uniwersita, studijny směr, ličba fachowych semestrow resp. lěto wotzamknjenja, titul zapodateho dźěła a wobkrućenje, zo je dźěło samostatny wudźěłk, kotryž njezrani awtorske prawo. Na dźěle samym so njesmě mjeno awtora/awtorki jewić, zo by so hódnoćiło bjeztoho, zo je awtor znaty/awtorka znata.

Dźěło ma so w pisomnej formje abo jako pdf-ka hač do 30.11.2025 na sćěhowacu adresu zapodać:

Maćica Serbska - Maćične myt 2025
Postplatz 2 / Póštowe naměsto 2
02625 Bautzen/Budyšin
mejlka: macica.serbska@web.de

Předsydstwo rozsudźi hač do 31.01.2026 wo spožčenju myta. Přećiwo rozsudej njeje prawniski puć móžny. Zakład za spožčenje myta su wustawki.

Wupisanje Myta Arnošta Muki 2025 jako PDF.