Sprachwahl   Rěč/Sprache/Language
Sprachwahl
Rěč/Sprache
file.title

Clemens Škoda: Domowina prosy wo pomoc woporam zemjerženja w Chorwatskej – podpěra za humanitarnu akciju

 

Dobry tydźeń po zemjerženju w Chorwatskej je srjedu wječor znowa zemski stork potrjecheny region zaržeć dał. Hižo po hodźoch su so sta domow zničili, sydom ludźi je swoje žiwjenje přisadźiło, wjac hač dwaceći su so zranili. Mnohe swójby buchu wosrjedź zymy bjezdomne. Hakle w lěće 2014 je wulka woda wobydlerjow Banovin domapytała.

Tež Federalistiska unija europskich narodow (FUEN), třěšneho zwjazka awtochtonych narodnych mjeńšin, podpěruje, woporam zemjerženja z darami poboku być. Domowina je jako zwjazk Łužiskich Serbow sobustaw FUEN a chce pomhać, sobu pjenjezy zběrać.

K tomu so Clemens Škoda, referent Domowiny za kulturne naležnosće a wukraj, wupraja:

„W času po surowej wójnje su ludźo w tutych kónčinach wospjet z woporom namocy přirody byli. Tež Chorwatska je tuchwilu sylnje wot koronapandemije potrjechena – móžeš sej lědma předstajeć, pod tajkimi wuměnjenjemi zemjerženje poćerpjeć. A potom wosrjedź kruteje zymy ze swójbu bjezdomny cyłu bědu wutrać dyrbjeć.

Runje w krizy abo katastrofje so pokazuje, hač smy k solidariće kmani. Tohodla prosymy Łužičanow wo podpěru. Mamy přećelow tam, na př. serbisku a čěsku mjeńšinu. 2015 mějachmy w tamnišim Daruvaru FUEN-seminar. Štóž dopomina so na přikład na Festiwal 2017, znaje tež folklornu skupinu Holoubička z tuteje kónčiny, zastupjerjow čěskeje mjeńšiny w Chorwatskej – tež naša skupina Přezpólni přebywaše 2018 tam na přećelskej kulturnej wuměnje.

Sobudźěłaćerjo Domowinskeho zarjada su so mjeztym ze sto eurami na humanitarnej akciji wobdźělili. Budźemy dale na situaciji w potrjechenym regionje podźěl brać a swojim partneram poboku być, zo njeby zjawnosć jich hórki dóńt zabyła. Smy wobydlerjam we Banovinje runje nětko pomocliwu kedźbnosć dołžni. Bychmy so wjeselili, hdyž bychu mnozy akciju podpěrowali.”

Přepokazać hodźa so pjenjezy na sćěhowacej konće:

Pomocna akcija Čěskeje mjeńšiny w Chorwatskej

IBAN: HR3323400091100113689

Privredna banka Zagreb

Přijimowar: Savez Ceha u Republici Hrvatskoj

Prošu ze zapisom: Pomoc — zemetreseni SMZ

SWIFT: PBZGHR2X

Pomocna akcija Serbskeje narodneje rady w Chorwatskej

IBAN: HR5223600001501530334

Bank Zagreb

Přijimowar: Srpskonarodnovijece, Gajeva 7, Zagreb

Prošu ze zapisom: For Humanitarian action „Banija is our home“ / za humanitarnu akciju „Banija je naša domizna”

SWIFT: ZABAHR2X

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Póstowe naměsto 2/Postplatz 2,
02625 Budyšin/Bautzen

tel. +49 (0)3591 550-202
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button