język   Rěč/Sprache/Language
język
Rěč/Sprache
file.title

Wuslědki posedźenja prezidija Domowiny

 

Pětr Brězan, referent za hospodarstwo a infrastrukturu Domowiny, zastupuje třěšny zwjazk w regionalnym wuběrku za přewodźenje změny strukturow w Sakskej. To je prezidij Domowiny na swojim digitalnym posedźenju štwórtk wobkrućił. Jeho zastupjer budźe Fabian Jacobs, čłon hospodarskeho wuběrka. Prezidij přihotowaše dale hłownu zhromadźiznu 12.6. w Slepom a přichodne wuradźowanje zwjazkoweho předsydstwa 7.5. w Budyšinje a digitalnje.

Na přichodnym posedźenju poradźowaceho wuběrka za prašenja serbskeho ludu poboku zwjazkoweho ministerstwa nutřkowneho, kotrež budźe hakle 22.6., chce předsyda Domowiny, Dawid Statnik, mjez druhim dalše wutworjenje rěčnych rumow, wobkedźbowanje zajimow Serbow w procesu změny strukturow a lěpše sposrědkowanje wědy wo Serbach na zjawnych šulach po cyłej Němskej tematizować. W prěnjej rozmołwje předsydy z młodostnymi, kotřiž su so za wobdźělenje na posedźenju požadali, su so dalše temy wukristalizowali: na přikład nadpady na serbskich młodostnych, mjenje běrokratije w młodźinskim dźěle a žadanje za kampanju zwjazka za image Serbow a serbšćiny.

Předsyda Domowiny informowaše wo aktualnym stawje jednanjow wo 4. finančnym zrěčenju Załožby za serbski lud a wotpohledźe Braniborskeje, swój plan naprawow za skrućenje serbskeje rěče dale pisać („dalej pisanje Krajnego plana za zmócnjenje dolnoserbskeje rěcy”). Domowina tuchwilu stejišćo Braniborskej zdźěłuje, kotre dalše winowatosće móhł kraj w zwisku z europskej chartu regionalnych a mjeńšinowych rěčow přewzać.

Z wjeselom je prezidij dźakny list serbskeho superintendenta Krystofa Rummela na wědomje brał, z kotrymž so wón za podpěru Domowiny dźakuje. Tak móžachu sej zamołwići na runinje krajneje ewangelskeje cyrkwje a cyrkwinskeho wobwoda Budyšin-Kamjenc prawa serbskich wěriwych bóle wuwědomić. Předsyda Domowiny je w rozmołwje z biskopom Bilzom wažnosć na to kładł, zo njerěči so jenož wo strukturach, ale prěnjotnje wo naprawach, kotrež zaručeja wozjewjenje Božeho słowa w serbšćinje.

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Póstowe naměsto 2/Postplatz 2,
02625 Budyšin/Bautzen

tel. +49 (0)3591 550-202
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button