Kowar: Přichodny folklorny festiwal hakle 2023 – přemysluja za 2021 wo regionalnej alternatiwje w ramiku „Lěta župow” Domowiny

 

XIV. Mjezynarodny folklorny festiwal „Łužica – Łužyca – Lausitz” klětu wupadnje. Dwulětnje so wotměwace wulkozarjadowanje w Budyšinje, Hochozy a Chrósćicach steješe hač donětka 22.-25.7.2021 w protyce serbskich wjerškow. Po wuradźowanju přihotowanskeho wuběrka wutoru wječor so jeho předsyda Marko Kowar wupraja:

„Z nazhonjenjow prěnjeho tajkeho festiwala wěmy, zo móžemy z wulkej prócu přihotowanje w běhu poł lěta zmištrować. Kompleksnosć tajkeho mjezynarodneho wulkozarjadowanja njeje naležnosć dnjow abo tydźenjow. To by rěkało, zo mamy najpozdźišo nětko započeć ze zrěčenjemi abo z přeprošenjemi wukrajnych hosći. Bohužel to dźeń a bóle přiwótřeneho połoženja pandemije dla móžno njeje. Tež najwjetši optimist njemóže wokomiknje z tym ličić, zo směmy hač do kónca zymy zaso takrjec normalnje dźěłać a zo su w juliju wšě hygieniske postajenja zběhnjene.

Tohodla njewidźi přihotowanski wuběrk žadyn praktikabelny puć, zaměry mjezynarodneho folklorneho festiwala w lěće 2021 zwoprawdźić. To nas samych jara boli, wšako smy so wot nalěća sem njepowalnje nadźijeli, zo so nam tajki puć radźi. Njeby nětkole rozumne było, dale nadźije šěrić, kotrež bychmy na kóncu tola přesłapić dyrbjeli.

Z druhimi słowami to woznamjenja, zo budźe XIV. Mjezynarodny folklorny festiwal „Łužica – Łužyca – Lausitz” hakle w lěće 2023. Smy wězo tež wariantu přestorčenja wo jedne lěto pruwowali, ale z praktiskich přičin zaćisnyli. W Slepom na přikład planuja za lěćo 2022 Mjezynarodny dudakowy festiwal a je dosć druhich dołhodobnje w kulturnych protykach zapisanych wjerškow.

Tohodla prosymy wo zrozumjenje za tón ćežki rozsud. Smy zwólniwi, hromadźe z towarstwami wo alternatiwach za klětu přemyslować. Domowina woswjeći 24.7.2021 stotu róčnicu załoženja župow a zahaji w tutym zwisku Lěto župow. Hłowna tema je mjezsobna wuměna ludźi wšěch kónčin Łužicy. Snadź so radźi, na tutym kóncu tydźenja na př. serbski lěćny swjedźeń hromadźe zeskutkownić.”