Sprachwahl   Rěč/Sprache/Language
Sprachwahl
Rěč/Sprache
file.title

2017/18

Rozprawa stawizniskeje sekcije Maćicy Serbskeje 2017/18

 

Wot lońšeje hłowneje zhromadźizny Maćicy Serbskeje je stawizniska sekcija w Budyskim hosćencu „Wjelbik“ přewjedła štyri zjawne zarjadowanja w rjedźe Maćičneje akademije. Běchu to:

1. 30. měrca 2017 přednošowaše dr. Theresa Jacobsowa, młoda wědomostnica Serbskeho instituta w Budyšinje, na temu „Serbska ludowa reja – imaterielne kulturne herbstwo“. Přednošk bě w serbskej rěči a posrědkowaše nam dohlad do wosebiteho wobłuka serbskeje kultury a jeho wuwića ze zašłosće hač do dźensnišich dnjow.

2. 24. awgusta 2017 móžachmy hosća ze zdaloka witać, a to dr. Alexandera Maxwella z Wellingtona w Neuseelandskej. Jeho mějachmy hižo raz w lěće 2013 jako referenta na Maćičnej akademiji. Přebywajo znowa na studijnej jězbje w Europje, wón nam dalši přednošk poskići – a to rěčnopolitiski pod temu . „Sorbisch innerhalb der slawischen Welt: Taxonomie und Nachahmung“. Wječork wotmě so w němskej rěči. Připosłucharjo dožiwichu njewšědneho referenta, kotryž zajimawu temu na napjate wašnje předstaji.

3. Serbski dorostowy wědomostnik bě 16. nowembra 2017 z našim hosćom. Młody stawiznar Alexander Pólk porěča na temu „Wuwiće serbskeho stawiznopisa w NDR-skim času“. Wón předstaji nam rezultaty swojeho masterskeho dźěła, kotrež bě loni na Techniskej uniwersiće w Drježdźanach wotzamknył. Wječork wotmě so w serbskej rěči a pozbudźowaše do žiwjeje diskusije, wšako bě wjetšina připosłucharjow předstajany čas socializma a tehdyše ideologizowanje serbskeho stawiznopisa sama sobu dožiwiła.

4. Posledni přednošk w rjedźe Maćičneje akademije mějachmy hakle zawčerawšim, 15. měrca 2018, hdyž nam mandźelskaj Mechtild a Wolfgang Opel pod temu „Weite Horizonte: Johann August Miertsching – Schuhmacher, Missionar, Polarforscher“ žiwjenje a skutkowanje najwuznamnišeho serbskeho misionara Ochranowskeje bratrowskeje jednoty Jana Awgusta Měrćinka předstajištaj. Přednošk bě w němskej rěči a tohorunja někotrych němskich zajimcow přiwabi.

Mějachmy potajkim w zašłej sezonje štyri přednoški, z toho dwaj w serbskej a dwaj w němskej rěči. Při tym mějachmy najmjenje 16, najwjace 34 wopytowarjow, štož móžemy tola jako někak spokojace wobhladować. Dźakować chcu so na tutym městnje hosćencarjam „Wjelbika“, kotřiž nas přeco přećelnje w swojej restawraciji hospoduja. Rjad Maćičneje akademije, kotryž smy nazymu 2009 załožili, chcemy tež w přichodźe dale wjesć. Namjety nowych temow a referentow su witane.

Stawizniska sekcija ma tuchwilu 13 zapisanych sobustawow. Ju nawjedujetaj Trudla Malinkowa jako předsydka a dr. Edmund Pjech jako městopředsyda. Sekciske zhromadźizny wot lońšeje hłowneje zhromadźizny MS njejsmy přewjedli. Njemějachmy to za trěbne, dokelž so drobne přihotowanske dźěła w mjezsobnym zwisku dorěča.

 

Trudla Malinkowa

předsydka

Budyšin, 17.3.2018