Medijowe wozjewjenje nast. dalewjedźenje brunicoweje jamy Wochozy

Přihotowanksi  wuběrk za dźěłarničku je so dźensa w SKC zetkał a po dlejšej diskusijej na sćěhowace medijowe wozjewjenje dojednał. Smy tuchwilu stajnje  so měnjacym rozsudam wustajeni, štož nastupa dalewjedźenje brunicoweje jamy Wochozy. Z tuteje přičiny njeje nam móžno, na spušćomnych konceptach za přichod serbskeje rěče, kultury, nałožkow a tradicijow kaž tež jich wuwiće dźěłać.Za 24. apryla běchmy w gmejnskim łopješku zarjadniskeho zjednoćenstwa Slepo na dźěłarničku přichoda přeprosyli. Dyrbimy ju wupadnyć dać. Dotal su rozsudy regionalneho planowanskeho zwjazka, dowolnosće statneho knježerstwa a na tutym zakładźe wotzamknjene zakładne zrěčenja za Slepo nošne stołpy za naše rěč a kulturu spěchowace projekty a naprawy tworili. Wjele z nich hodźachu so zwoprawdźić. Dopominam na model Witaj w Rowniskej pěstowarni a na pokročowanje rěčneje rewitalizacije z pomocu modela 2plus na zakładnej a wyšej šuli w Slepom. Dźěło towarstwow a SKC móžeštej so podpěrować. Z planom naprawow Sakskeho statneho knježerstwa k pozbudźenju a wožiwjenju nałožowanja serbšćiny je so poradźiło, zo so slepjanšćina jako rěč připóznawa. Smy našu zwólniwosć zwuraznili, so za trěbne kročele k certifikowanju a jeje připóznaću po europskim prawje sylnje angažować. Słownik slepjanšćiny budźe bórze hotowy, na gramatice dźěłamy.Wězo su tež naprawy k tomu słušeli, kotrež bychu při přesydlenju přidatnje trěbne byli. Jedyn z nošnych stołpow při wozrodźenju rěče je twar dwučaroweho šulskeho centruma. Tu pak tčimy přeco hišće w fazy zahajenja. Mjeztym je projekt dospołnje wohroženy.W zwisku z planowanej předanju brunicoweje sparty, wo kotruž so maćerny koncern Vattenfall Šwedska  prócuje, nasta w septembru 2014 faza stagnacije. Byrnjež Vattenfall swoju wolu za nowe zakładne zrěčenja zwuraznił, njeje k tomu dóšło. Potom mějachu to parafy być, zo by nowy wobsedźer widźeć móhł, zo su so gmejny a Vattenfall wo wěstych dypkach dojednali.Jejko do horšće je wjace hač slubjena kokoša tak su so gmejny ke kompromisam předrěli, zo bychu rady naćiskam zrěčenjow přihłosowali.Kokoš je preč a jejko je so puknyło. Dokument 10 zasadnych dypkow k wikam miliny ze zwjazkoweho ministerstwa za hospodarstwo je situaciju dospołnje změnił. Sće z medijow zhonili, zo je Vattenfall tutych njewěstych wuměnjenjow dla nětko tež wot twara noweho šulskeho kompleksa wotstupił.W tutej fazy powšitkowneje bjezorientownosće dyrbi jako prěnja politika jednać. Wona dyrbi předewšěm rozsudy tworić za puć, kotryž ma so nastupić, a dyrbi nětko wjetšemu kruhej potrjechenych we Łužicy swoje rozsudy plawsibelnje wopodstatnić. Manfred HermašžupanJakub Lorenc-Zalěski z.t.