Hłownu zhromadźiznu Domowinskeje skupiny Malešecy srjedu popołdnju dźěći Witaj-pěstowarnje z třomi spěwami zahajichu. Předsydka Maritta Schneiderowa na to lětuše aktiwity wuhódnoći. Skupinje přišłuša 23 čłonow, witachu jednu nowu čłonku, wot jedneje so rozžohnowachu.

W meji wotmě so nalětni koncert w Malešecach, kiž skupina kóžde lěto sobu organizuje. Dale wobdźěli so čłon předsydstwa na zetkanju župy Domowinskich skupin a towarstwow župy “Jan Armošt Smoler”, na kotrež je župa w měrcu přeprosyła. W septembrje mějachu přednošk z filmom wo něhdyšim kulturnym žiwjenju w Malešecach, kiž pokaza jim Herbert Probt z Jatšoba. Předsydska wuzběhny dobre zhromadne dźěło z Domowinu a ze župnym předsydstwom župy “Jan Arnošt Smoler”.

Za klětu maja čłonojo skupiny dosć konktretne plany. 25. meje budźe nalětni koncert z 1. Serbskej kulturnej brigadu. Dale hotuja so w Malešecach na 800-lětny jubilej. Wot 15.-22. junija změja swjedźenski tydźeń. 15. junija maja na wjesnej žurli serbske poskitki w srjedźišću stać: wustajeńca, jejka wóskowanje, přehladka narodnych drastow a wjele wjac.