Rěčam přichilena komuna - Serbska rěč je žiwa

Swobodny stat Sakska zawjaza města a gmejny w serbskim sydlenskim rumje, wobzamknyć wustawki, po kotrychž matej so serbska rěč a kultura spěchować.

Wubědźowanje wo rěčam přichilenu komunu chce k tomu pohnuwać, zo komunalne zarjadnistwa ze serbskimi a němskimi wobydlerjemi do rozmołwy přińdu a nowe kreatiwne ideje za zdźerženje a dalewuwiće serbskeje rěče a kultury wuwija a ze žiwjenjom napjelnja.

Tute wubědźowanje steji znowa pod patronatstwom prezidenta Sakskeho krajneho sejma dr. Matthiasa Rößlera.

Wubědźowanje wo rěčam přichilenu komunu bu wot Serbskeje ready iniciěrowane. Wone wotměje so k třećemu razej. Akciju podpěrujetej Domowina a Załožba za serbski lud.

Komuna je rěčam přichilena, jeli serbsku rěč spěchuje a dwurěčnosć jako duchowno-kulturne bohatstwo widźomnje podpěruje a wuwědomja.