select language   Rěč/Sprache/Language
select language
Rěč/Sprache
file.title
Maćica Serbska z.t. > Sekcije, komisije, wuběrki > Sekcija stawizny > Rozprawy > 2019/2020

2019/2020

Rozprawa stawizniskeje sekcije 2019/2020

Wot lońšeje hłowneje zhromadźizny Maćicy Serbskeje je stawizniska sekcija w Budyskim hosćencu „Wjelbik“ přewjedła tři zjawne zarjadowanja w rjedźe Maćičneje akademije. Běchu to:

1. Dnja 14. měrca 2019 přednošowaše slawist a kulturowědnik Julian Nyča wo temje „,Horjekach je wótcny kraj!‘ - Wopomnjenska kultura w dwurěčnej Łužicy po Prěnjej swětowej wójnje“. Referent předstaji wuslědki swojeho masterskeho dźěła wo wojerskich pomnikach w dwurěčnej Łužicy, z kotrymž bě njedawno swój wysokošulski studij w Berlinje zakónčił.

2. Składnostnje lońšich 200. narodnin Jaroměra Hendricha Imiša porěča Serbski superintendent Jan Malink 21. nowembra 2019 wo žiwjenju a skutkowanju Hodźijskeho fararja a wuznamneho wótčinca pod temu „,Ta razna postawa mi nochce z hłowy.‘ Imišowe skutkowanje za Serbstwo a cyrkej“.

3. Składnostnje 200lětneje róčnicy załoženja prěnich serbskich misionskich towarstwow přednošowaše dr. Lubina Malinkowa, stawiznarka Budyskeho Serbskeho instituta, 27. februara 2020 na temu „,Lubosć k misionstwu je našemu narodej přinarodźena.‘ 200 lět serbske misionske towarstwa“.

Dalši, štwórty, přednošk bě předwidźany za 26. měrc 2020. Jako referentku běchmy zdobyli Francisku Grajcarekec z Chasowa, studentku sorabistiki na Lipšćanskej uniwersiće, z přednoškom na temu: „Imaterielne kulturne herbstwo – wěda wo serbskej narodnej drasće na přikładźe třoch generacijow drastoweho regiona katolskich Serbow w 21. lětstotku“. Přeprošenja na tutón wječork běchu hižo wozjewjene, nažel wšak dyrbjachmy jón koronakrizy dla krótkodobnje wotprajić.

Wšitke mjenowane přednoški přewjedźechu so w serbskej rěči. Wopytowarjow bě kóždy króć něhdźe 20. Rjad Maćičneje akademije smy nazymu 2009 załožili, tak zo měješe wón loni swój 10lětny jubilej. Tež w přichodźe chcemy jón dale wjesć.

Stawizniska sekcija ma tuchwilu 13 zapisanych sobustawow. Ju nawjedujetaj Trudla Malinkowa jako předsydka a dr. Edmund Pjech jako městopředsyda. Sekciske zhromadźizny wot lońšeje hłowneje zhromadźizny MS njejsmy přewjedli. Njemějachmy to za trěbne, dokelž so drobne přihotowanske dźěła w mjezsobnym zwisku dorěča.

Trudla Malinkowa, předsydka