select language   Rěč/Sprache/Language
select language
Rěč/Sprache
file.title

Statnik: Rozmach serbowanja w ewangelskich Serbach - nadźijamy so dalšich impulsow za cyły serbski lud w dobrej tradiciji reformacije

 

K zdźělence wo zapokazanju noweho Serbskeho superintendenta so předsyda Domowiny, Dawid Statnik, wupraja:

„Serbski superintendent je swětłownja narodneho žiwjenja - a tohodla so wjeselimy, zo su naši ewangelscy Serbja dale jara kompetentnje zastupowani. Dotalny dołholětny serbski superintendent Jan Malink móže na rozmach serbowanja w ewangelskich Serbach wróćo hladać.

Přejemy jeho naslědnikej Krystofej Rummelej, zo móže tež na tutym puću spomóžnje dale kročić. Wón sam je přeswědčacy posoł přićahliwosće čiłeje serbskosće, wšako je so wón jako dorosćeny z wulkim angažementom našemu rěčnemu rumej přidružił. Tak so nadźijamy dalšich impulsow za cyły serbski lud, takrjec w dobrej tradiciji reformacije, kotraž je spisownu serbšćinu slynje spěchowała.

Wosebje zwjeselace je přiběraca ekumeniska zhromadnosć w Serbach. Je dale a wjac katolskich Serbow, kotřiž rady na zarjadowanja ewangelskich sotrow a bratrow chodźa; a samo mjez křižerjemi je dawno ewangelskich wěriwych. Tak njech to dale póńdźe - Bohu k česći a Serbam k wužitku."

Tu jako dokumentaciju nowinsku zdźělenku Serbskeho wosadneho zwjazka, kotraž je dźensa dóšła:

Zapokazanje noweho Serbskeho superintendenta

Ze swjedźenskej Božej słužbu w Hodźijskej cyrkwi swj. Pětra a Pawoła so na reformaciskim dnju nowy Serbski superintendent Krystof Rummel (47) do swojeho zastojnstwa zapokaza. Wón slěduje superintendenta Jana Malinka, kiž je so lětsa w lěću na wuměnk rozžohnował. Rummel je dwanaće lět Hodźijski wosadny farar a budźe tele dźěło dale wukonjeć. Tule je hakle jako dorosćeny serbsce nawuknył. Do toho je Krystof Rummel mjez druhim jako młodźinski farar w Rudnych horinach skutkował.

Wosady kołowokoło Budyšina su domizna ewangelskich Serbow. Serbski wosadny zwjazk je zhromadne zastupnistwo tych wosadow sakskeje krajneje cyrkwje, kiž leža w serbskim sydlenskim rumje. Serbski superintendent nawjeduje serbske cyrkwinske žiwjenje a koordinuje tež zhromadne dźěło z dwurěčnymi wosadami Ewangelskeje cyrkwje Berlin-Braniborska-šleska Hornja Łužica. Wjacori duchowni Hornjeje a Delnjeje Łužicy swjeća prawidłownje Bože słužby w serbskej rěči.

Kontakt:

Krystof Rummel, Serbski superintendent: pfarramt-goeda(at)web.de

Mato Krygaŕ, zastupowacy předsyda Serbskeho wosadneho zwjazka: mato.krygar(at)web.de

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Póstowe naměsto 2/Postplatz 2,
02625 Budyšin/Bautzen

tel. +49 (0)3591 550-202
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button