select language   Rěč/Sprache/Language
select language
Rěč/Sprache
file.title

Aktualne informacije wo posedźenju zwjazkoweho předsydstwa pod wosebitymi wuměnjenjemi – prěni raz přez livestream w interneće

 

Prěni raz móža pjatk, 11. decembra, wot 17.30 hodź. zajimcy posedźenje zwjazkoweho předsydstwa (ZP) Domowiny přez livestream sćěhować, pak na internetnej stronje třěšneho zwjazka: www.domowina.de/hsb/start/ pak direktnje přez youtube: posedźenje Zwjazkoweho předsydstwa Domowiny - YouTube . Prosymy wšěch přijimowarjow tuteje zdźělenki, informaciju wšěm potencielnym zajimcam dale sposrědkować.

Dźesać čłonow ZP so na posedźenju digitalnje přez widejokonferencu wobdźěli. Zastupjerjo medijow a dalši zajimcy njech so prošu pisomnje přizjewja, jeli chcedźa na žurli Serbskeho domu w Budyšinje přitomni być: sekretariat@domowina.de . Po cyłym Serbskim domje a na zarjadowanju cyły čas na wšěch městnach knježi winowatosć, nimo dodźerženja wotstawka 1,5 metra tež nahubnik wužiwać.

Prezidij Domowiny poruča, jako prěni dypk dnjoweho porjada we wobłuku wobzamknjenjow próstwu wokrjesa Dubja-Błota wo spěchowace čłonstwo wobjednać a wothłosować. To by po planje někak w 18.05 hodź. było. Do toho su na zwučene wašnje naprašowanja čłonow Domowiny a hosći na dnjowym porjedźe. Tute prašenja móža ludźo tež do toho mejlnje zapodać: Marcel.Brauman@domowina.de . Wuradźowanje so skónči tón raz w 21 hodź. – wobkedźbujo najnowše postajenja wokrjesa Budyšin dla wysokeje korona-incidency, po kotrychž maja wobydlerjo po 22 hodź. a hač do 6 hodź. doma wostać.

Dale so zaběra zwjazkowe předsydstwo mjez druhim z přewjedźenjom a terminom klětušeje hłowneje a wólbneje zhromadźizny, klučom delegatow, modusom wólbow ZP za dobu 2021-2025, naćiskom dźěłowych směrnicow Domowiny za dobu 2021-2023, rozprawu wo zwoprawdźenju nadawkow dźěłowych směrnicow w dobje 2019-2021, hospodarskim planom za klětu, informaciju wo digitalnej zhromadźiznje FUEN, ze stawom wobjednawanja europskeje wobydlerskeje iniciatiwy Minority SafePack, naprawami změny strukturow we Łužicy a z posedźenjom poradźowaceho wuběrka za prašenja serbskeho ludu poboku zwjazkowemu ministerstwu nutřkowneho atd.

W zwisku z posedźenjom poradźowaceho wuběrka je předsyda Domowiny, Dawid Statnik, rozprawu wo połoženju serbskeho ludu zapodał, kotraž steji Wam tu k dispoziciji:

www.domowina.de/fileadmin/Assets/Domowina/Mediathek/Dokumente/TOP6.3.-2.rozprawa_wo_polozenju_serbskeho_ludu.pdf

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Póstowe naměsto 2/Postplatz 2,
02625 Budyšin/Bautzen

tel. +49 (0)3591 550-202
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button