select language   Rěč/Sprache/Language
select language
Rěč/Sprache
file.title

Zwjazkowe předsydstwo w Slepom – Miłoraz / serbske rjadownje / nowy čłon prezidija / transparentne dźěło

 

Pjatk wječor je so Zwjazkowe předsydstwo (ZP) Domowiny w Serbskim kulturnym centrumje Slepo schadźowało. To bě prěnje wuradźowanje gremija w času koronakrizy.

Prěnja tema běše přesydlenje Miłoraza hač do lěta 2024 do Slepoho – k tomu je Slepjanski wjesnjanosta Reinhard Bork informował. Po jeho wuwjedźenjach njeje nichtó nuzowany, přećiwo swojej woli Miłoraz wopušćić, dokelž budźe hišće jara dołho trać, doniž so bagry jamy wjesce njebliža, a móhło być, zo so konflikt rozpušći, dokelž LEAG snadź wot stata wotškódnjenje dóstanje.

Někotři přitomni su swoje wotpokazanje planowaneho přesydlenja wjeski zwuraznili. Předsyda Domowiny, Dawid Statnik, je na bazodemokratisku strukturu třěšneho zwjazka skedźbnił a zo je so potrjechena župa jednohłósnje pozicioněrowała. Župan Manfred Hermaš praješe, zo župa „Jakub Lorenc-Zalěski” w tajkich bytostnych prašenjach w přezjednosći z wjetšinu wjesneje ludnosće jedna, wšako móže so žiwe Serbstwo jeničce w socialnej zhromadnosći zachować a dale wuwiwać.

W ramiku spominanja na wotbagrowane serbske wjeski a hladajo na aktualne aspekty wustupa ze zmilinjenja brunicy so Dawid Statnik nadźija, „zo budźe Miłoraz poslednja wjeska serbskeho sydlenskeho teritorija, kotraž so přesydli. Domowina tež w tutym padźe dale swoju poziciju zastupuje, zo je zasadnje přećiwo dalšim přesydlenjam. Ale w jednotliwym padźe akceptuje wotum wjetšiny wobydlerstwa. Zdobom poskići wobydlerjam pomoc při wobchowanju serbskeje identity w zwisku z přesydlenjom. Domowina žada sej dołhodobny a rjadowany wustup z wudobywanja a zmilinjowanja brunicy a dale statny spěchowanski program za strukturnu změnu we Łužicy.” W mjeńšinje wopominanja su čłonojo ZP na wopory wotbagrowanja serbskich wjeskow spominali.

Předsydka wuběrka za zjawnostne a lobbyjowe dźěło, Marka Cyžowa, informowaše, zo je wuhódnoćenje woprašowanja čłonow serbskich towarstwow a zwjazkow dokónčene. Najwažnišej konkluziji stej zapřijeće regionalneje zjawnosće do posedźenjow zwjazkoweho předsydstwa a transparenca wšědneje dźěławosće Domowiny. Wuběrk sej tohodla přeje, zo zarjad w přichodźe stajne simultane tołmačenje za serbsce njerozumjacych hosći zaruča – kaž je so to na tutym posedźenju w Slepom z pomocu dr. Beaty Brězanoweje, nawodnicy Rěčneho centruma Witaj, stało. Domowinski zarjad njech pokročuje ze swojim zjawnostnym dźěłom wo wuslědkach wuradźowanjow zarjadniskeho wjednistwa a referentow a regionalnych rěčnicow, kaž je mjeztym z wašnjom.

Katrin Suchec-Dźisławkowa, čłonka ZP a zastupjerka serbskeje staršiskeje iniciatiwy Radwor, rozprawješe wo wočakowanjach staršich, zo so w kóždym lětniku zakładneje šule serbska rjadownja wutwori, kotraž hač do kónca štwórteho lětnika wobsteji. Předsyda Domowiny, Dawid Statnik, Radworskim staršim runja Budyskim, hdźež su so podobne problemy jewili, zhromadne postupowanje poskićuje. Zwjazkowe předystwo, tak Statnik, je serbskim staršim poboku a jich stejišćo jasnje podpěruje. Wón so wjeseli, zo je so w kooperaciji wšěch serbskich akterow njedawno radźiło, na Ralbičanskej wyšej šuli runja Worklečanskej dwě serbskej rjadowni w 5. lětniku zarjadować.

ZP powoła na namjet předsydy Domowiny młodeho delnjoserbskeho wědomostnika Maximiliana Hasackeho do prezidija Domowiny. Hasacky dźěła jako referent w kompetencnym centrumje zwjazkoweho wobswětoweho ministerstwa w Chóśebuzu za škit klimy w industriji, kotraž wjele energije přetrjebuje. Nowa předsydka kubłanskeho wuběrka budźe jeho čłonka Marlis Młynkowa, kotraž dźěła w Serbskim šulskim towarstwje.

Wotličenje hospodarskeho plana Domowiny z lěta 2019 a aktualizowany dźěłowy porjad za zarjad a Rěčny centrum Witaj (RCW) je ZP na wědomje brało. W nowym porjedźe po nazhonjenjach z časa pandemije so słužbne dźěło wot doma jasnišo rjaduje. Wobzamknjenje naćiska změny wustawkow třěsneho zwjazka za diskusiju je gremij nachwatał (w februarje njebě ZP wjele chorych čłonow dla wobzamknjenja kmane). ZP je zdobom oficielnje klětušu hłownu wólbnu zhromadźiznu za 27.3.2021 zwołało a wuběrkam nadawk dało, dźěłowe směrnicy za čas 2021-2023 dale pisać.

Domowinski zarjad wo přihotach na přestorčenu Europeadu 2021 a přichodnym nowym digitalnym systemje za gremije třěšneho zwjazka informowaše. Z nim ma so transparentniše a efektwiniše zhromadne dźěło zmóžnjeć.

Foće: Maximilian Hasacky, nowy čłon prezidija Domowiny;
Marlis Młynkowa, nowa předsyka kubłanskeho wuběrka zwjazkoweho předsydstwa Domowiny.

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Póstowe naměsto 2/Postplatz 2,
02625 Budyšin/Bautzen

tel. +49 (0)3591 550-202
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button