Porjad k spožčenju „Čestneho znamješka Domowiny”

Preambla Čestne znamješko Domowiny spožča so za wosebite wukony při zwoprawdźenju programa Domowiny - Zwjazka Łužiskich Serbow z.t. Wuznamjenjenje je bjezwuwzaćnje narodnemu dźěłu we wobłuku třěšneho zwjazka a jemu přisłušacych towarstwow wěnowane. Wone njesmě so prěkować z "Mytom Domowiny", kiž česći narodne skutki wšitkich Serbow na najwšelakorišich polach. Za spomožne skutkowanje w Domowinje - Zwjazka Łužiskich Serbow z. t. a w třěšnemu zwjazkej přisłušacych towarstwach spožča so "Čestne znamješko Domowiny".

§ 1 Wašnje spožčenja

1. "Čestne znamješko Domowiny" je wuznamjenjenje Domowiny - Zwjazka Łužiskich Serbow z.t. 2. "Čestne znamješko Domowiny" spožča so jednotliwcam. 3. Wuznamjenjenje přepoda so lětnje jónu na wuznamjenjenskim zarjadowanju Zwjazkoweho předsydstwa Domowiny.

§ 2 Zasady spožčenja

1. Wuznamjenjenje smě so jenož zapisanemu abo čestnemu čłonej Domowiny wotpowědnje Domowinskim wustawkam spožčić. 2. Ličba wuznamjenjenjow je na lětnje dźesać wobmjezowana. 3. Wuznamjenjenje smě so na wosobu jenož jónu spožčić.4. K wuznamjenjenju słušetej Čestne znamješko, wopismo a pjenježny dar we wysokosći 100,00 €.

§ 3 Zapodaće namjetow a rozsud k spožčenju

1. Namjety za wuznamjenjenja smědźa wolene gremije Domowiny a jej přisłušace towarstwa na Zwjazkowe předsydstwo Domowiny zapodać. 2. Hač do 30. junija kóždeho lěta maja pisomne namjety z wotpowědnymi wopodstatnjenjemi w Domowinskim zarjedźe předležeć. 3. Mytowanski wuběrk Zwjazkoweho předsydstwa Domowiny za „Myto Domowiny” a „Myto Domowiny za dorost” rozsudźi wo spožčenju „Čestneho znamješka Domowiny“. Přećiwo rozsudam je prawniski puć wuzamknjeny.

§ 4 Wozjewjenje wo spožčenju

Mjena nowych nošerjow "Čestneho znamješka Domowiny" so zjawnosći spřistupnja.

§ 5 Płaćiwosć

Porjad nabudźe z wobzamknjenjom Zwjazkoweho předsydstwa Domowiny dnja 3.5.2010 swoju płaćiwosć a so w interneće pod adresu Domowiny (serbsce, němsce) wozjewi.

Změny wobzamknje Zwjazkowe předsydstwo Domowiny.

Jan Nuk, předsyda