Kino w Radworju

Dnja 12.9.2020 wotmě so open-air kino w Radworju. Wuhotował a zarjadował bě jón Radworski młodźinski klub,kiž je čłon župy „Jan Arnošt Smoler“ Budyšin.Dohromady wopyta 90 hosći kinowy wječor. Na areal młodźinskeho kluba přišli běchu swójby z dźěćimi, młodostni a dorosćeni.Prěni film, kiž so ze započatkom čmićkanja pokaza bě „Peeweje – mišterstwa na lodźe“ do serbšćiny synchronizowany film. Mjez serbskimi rěčnikami, kiž su film synchronizowali běchu młodostni z Radworja.Po tym bě hornjoserbska premjera filma „SMY“. Je to film wo identiće młodych Serbow. Film serbskeju režiserkow Luisy Nawkec a Sofije Cyžec bě so 2019 na Łužiskej filmowej přehladce w ramiku Choćebuskeho filmoweho festiwala z prěnim městnom wuznamjenił. Wobej běštej na tutym wječoru w Radworju přitomnej. Nastork za film bě, zo wutwori so cyłk Serbki sejm a młodostneju zaběraše prašenje Što je serbska identita. Krótkofilm měješe němske podtitule.Jako třeći film wječora pokaza Radworski młodźinski club film Imitation game. Młodostni z druhich wjeskow běchu tohorunuja do Radworja přijěli a dachu sebi zhromadnosć lubić.