select language   Rěč/Sprache/Language
select language
Rěč/Sprache
file.title

Wosebita wučba serbšćiny w bróžni Domowiny we Wojerecach

Srjedu dopołdnja běchu w domje Domowiny we Wojerecach šulerjo 3. lětnika zakładneje šule „Handrij Zejler” na wosebitu wučbu serbšćiny přišli. Tež Werner Sroka, kotryž je jako zastupjer Domowiny poradźowacy čłon šulskeje konferency na Zejlerjowej šuli, běše přitomny, zo by sobu pomhał dopołdnjo wuhotować. Po tym zo su šulerjo na zahrodźe zhromadnje snědali, je regionalna rěčnica Sonja Hrjehorjowa jim w bróžni powědančko „Dyrdomdeje Pumpota – šibałca ze Spal” z pomocu kamishibai-wobrazow powědała. Běše to proba, kak so wobrazy a teksty wot šulerjow přijimuja, prjedy hač so wšitko do ćisća da. Štwórtk je 5. lětnik Lessingoweho gymnazija ze swojej wučerku Lubinu Kühnowej přichwatał a samsny program z wjeselom dožiwił.

Šulerjo běchu přewšo koncentrowani, su jara derje sobu činili a běchu přijomny a dźakowny publikum. Wjesela so hižo na dalšu powěsć wo Připołdnicy, kotraž so tež z pomocu pjenjez z wubědźowanja „Čiń sobu” jako wobrazowa mapa za kamishibai-dźiwadło přihotuje.

Potom su na zahrodźe wšelake zabawne hry přihotowane byli, kaž skakanje w měchach, mjetanje tyzkow, ćahanje powjaza a mjetanje rynkow. Wosebje wjesołe běchu, zo běše kehelowanska čara skónčnje zaso wužiwajomna – wuskutk dalšeho projekta Wojerowskeje župy „Handrij Zejler” w ramiku „Čiń sobu”.

Na kóncu pobyta šulerjow je Sonja Hrjehorjowa jich namołwjała, w prózdninach serbske bajki čitać, sebi najrjeńšu wupytać a w nowym šulskim lěće zhromadnje bajku za wobrazowu mapu ilustrować a zaso powědać. Wjesela so na tutón nadawk a su slubili, jeli šula w nazymje zaso normalnje běži, jón potom w bróžni wšěm zajimcam předstajić a so na wubědźowanju wobdźělić.

Foto (wot srjedy): Werner Sroka

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Drježdźanska dróha 18 / Dresdener Str. 18,
02977 Wojerecy - Wórjejce /
Hoyerswerda (HOYWOJ)

tel. +49 (0)3571 60 84 614
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button