select language   Rěč/Sprache/Language
select language
Rěč/Sprache
file.title

Domowina gratuluje Měrćinej Weclichej – Statnik: „Wurjadna a wuwzaćna wosobina serbskeho žiwjenja z njesebičnym zapalom”

Póndźelu dopołdnja je Domowina oficielnje Měrćinej Weclichej k jeho njedawnemu jubilejej 50 lět skutkowanja na jewišću gratulowała. Předsyda Domowiny, Dawid Statnik, přepoda jemu jako wosebite počesćenje medalju „Serbski dudak”. To je wuznamjenjenje, kiž móže předsyda wot stoćin třěšneho zwjazka při wosebitej składnosći samostatnje spožčeć. Čestne znamješko a Myto Domowiny su Měrćinej Weclichej hižo 2001 a 1991 spožčili. Na gratulaciji w Kukowje stej so čłonce předsydstwa župy „Michał Hórnik” Kamjenc, Zala Cyžowa a Katharina Jurkowa, wobdźěliłoj.

K gratulaciji a počesćenju so předsyda Domowiny, Dawid Statnik, wupraja:

„Měrćin Weclich je wurjadna a wuwzaćna wosobina serbskeho žiwjenja: Wón je hižo jako 13-lětny na zelenych kwasach piskał a spěwał. Nětko je čas złotych kwasow tych, kotřiž su sej jeho tehdom skazali. 50 lět steji w našim ludźe a mjez druhim w Čěskej přewšo woblubowany spěwar, hudźbnik, komponist, wotkrywar a wuwiwar młodych talentow na jewišću.

Ze swojej njesprócniwej a sporej dźěławosću a tworićelskosću je wón generacijam dźěći a młodostnych žiwu serbšćinu a powabliwe serbske kulturne žiwjenje swjatk a pjatk sposrědkował. Jako horliwy Serb z ćěłom a dušu a wusahowacej wuměłskej produktiwitu je wón hižo ze swojim dotalnym žiwjenskim skutkom slědy zawostajił, kotrež naš serbski swět na dołhodobnje skutkowace wašnje wobohaćeja. Zdobom je sej wón čas žiwjenja swój ludowy raz wobchował, hłuboko zakorjenjeny wosrjedź ludźi našeje serbskeje domizny. Jeho njesebičny zapal njech je nam z přikładom a nastorkom, swoju towaršliwosć tak wjesele pěstować, kaž to nam Měrćin Weclich hižo poł lětstotka wuspěšnje a wunošnje wobradźa.

Přejemy jemu za dalši puć wjele zboža a so jemu za mnohostronsku skutkownosć wutrobnje dźakujemy! To prajimy jako Zwjazk Łužiskich Serbow tež w mjenje wšěch, kotrychž žiwjenje je Měrćin Weclich ze swojimi hudźbnymi twórbami přewodźał – z nazwučowanjemi, programami na swjedźenjach a titulemi w rozhłosu, z kotrymiž wón nas rano budźi. Tež jako dołholětny redaktor Serbskich Nowin běše wón spušćomny posoł wosebitosćow a potencialow serbskeho ludu. A nětk so nadźijamy, zo Měrćin kruty termin zastupa do wuměnkarstwa na polu hudźby njeznaje!”

Na wobrazu: Dawid Statnik, předsyda Domwiny, přepoda Měrćinej Weclichej medalju a wopismo „Serbski dudak”. Gratulowałoj staj zdobom čłonce předsydstwa župy „Michał Hórnik” Kamjenc, Zala Cyžowa a Katharina Jurkowa (w.l.). Foto: Domowina

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Póstowe naměsto 2/Postplatz 2,
02625 Budyšin/Bautzen

tel. +49 (0)3591 550-202
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button