select language   Rěč/Sprache/Language
select language
Rěč/Sprache
file.title

Aktiwity staršich a młodźiny w srjedźišću župneho předsydstwa w Radworju – chcedźa wjac kubłanja na maćernorěčnym niwowje

 

Župne předsydstwo župy „Jan Arnošt Smoler” Budyšin je so štwórtk w Radworju schadźowało. W srjedźišću steješe wuměna ze staršiskej iniciatiwu a z młodźinskim klubom, informowaše Katja Liznarjec, reginalna rěčnica na teritoriju župy. Wito Bejmak a Katrin Suchec-Dźisławkowa rozprawještaj wo dźěle iniciatiwy, kiž so wo to prócuje, zo so kóžde lěto maćernorěčna rjadownja w 1. lětniku wutworja a pokročuje. Starši a župa paruja w dotalnym kubłanskim systemje 2plus transparencu a jasnu strategiju, dźěćom wšěch rěčnych skupin krok po kroku serbšćinu tak sposrědkować, zo wone rěč wšědny dźeń mjez sobu nałožuja. Tohodla sej žadaja, zo so wučba ryzy serbsce podawa, zo by imersija woprawdźe fungowała.

Katrin Suchec-Dźisławkowa chce so jako nowa kubłanska referentka Domowiny za kubłansku strategiju zasadźować, zo by ze serbskich kubłanišćow wjac maćernorěčneho dorosta wurostło. W tutym zwisku diskutowachu tež wo zwoprawdźenju wospjetneho wobzamknjenja hłowneje zhromadźizny třěšneho zwjazka, zhromadnje ze wšěmi akterami zwjazk serbskich šulow po cyłej Łužicy wuwiwać. Za wažne maja wobdźělnicy dosć dobrych Witaj-skupin w pěstowarnjach, zo by dale a wjac dźěći hnydom po zastupje do šule do rjadownje na maćernorěčnym niwowje chodźić móhło. Leńka Thomasowa, rěčnica župy, wupřa předsydomaj a čłonam iniciatiwy wuspěch a wosebje wutrajnosć a mocy w prócowanjach.

Luiza Winarjec, Marwin Paška a Beno Sćapan předstajichu aktiwity młodźinskeho kluba: Lětsa je Satkula-turněr bičwolejbula, tež PowerSerb ma so hišće wotměć, a mejemjetanje kóžde lěto wuhotuja. Tuchwilu w klubje přetwarja. Rěčnje měšana młodźina wobohaća wjesne žiwjenje a nałožki pěstuje.

Kubłanska jězba župy budźe lětsa 25.9.2021 a powjedźe do Mortkowa a Łaza, hdźež podaja so na slědy Handrija Zejlerja składnostnje jeho 150. posmjertnin klětu. Na dompuću pozastanu čłonojo jězby při ródnym domje Mikławša Joachima Wićaza a tam skrótka na wuznamneho serbskeho informatikarja spominaja, w Radworskej Meji so jězba z kofejpićom zakónči.

25.7.21 budźe na zahrodźe sundowner-bary w Budyšinje pisane popołdnjo za serbske swójby. Započatk je w 15 hodź. Přihotuja wšelakore serbskorěčne poskitki za dźěći. Zarjadowar Domowina nadźija so bohateho wopyta swójbow z Budyšina, Malešec a cyłeho narańšeho Budyskeho kraja.

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Drježdźanska dróha 18 / Dresdener Str. 18,
02977 Wojerecy - Wórjejce /
Hoyerswerda (HOYWOJ)

tel. +49 (0)3571 60 84 614
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button