zvolte jazyk   Rěč/Sprache/Language
zvolte jazyk
Rěč/Sprache
file.title

Přezjednaj wo wuznamje Serbow – nowa Łužiska zapósłanča w rozmołwje z předsydu Domowiny

 

Nowa Łužiska zapósłanča frakcije Lěwicy w Sakskim krajnym sejmje, Antonia Mertsching, je póndźelu prěni raz Serbski dom w Budyšinje wopytała. Předsyda Domowiny, Dawid Statnik, je politikarce w Serbskej kulturnej informaciji mnohostronske fasety serbskeho žiwjenja rozkładł. Zapósłanča so jenož za serbske institucije njezajimowaše, ale je so za hornjo- a delnjoserbšćinu a wočakowanjemi Serbow w dobje strukturneje změny wobhoniła.

Přezjednaj běštaj sej wobaj, zo njesmě jeničce wo inwesticije do dróhotwara hić, ale wo dołhodobnje skutkowace tworjenje nowych dźěłowych městnow. Projekty we wobłuku němsko-serbskeje zhromadnosće a dźěła z dźěćimi a młodostnymi njesmědźa pobrachowaceho swójskeho podźěla na financowanju dla zwrěšćić – tu ma krajna politika pjenježnje poboku być.

Dawid Statnik, předsyda Domowiny, po rozmołwje praji: „Domowina je w Braniborskej a Sakskej jako zastupnistwo zajimow serbskeho ludu připóznata. Wona we sebi wjac hač 180 towarstwow, zwjazkow a skupin zjednoća. Tuta wšelakora baza nam nadawk dawa, z krajnymaj sejmomaj stajnu wuměnu pěstować. Wjeselimy so na zhromadne dźěło tež z nowymi zapósłancami kaž z Antoniu Mertsching.”

Antonia Mertsching, Łužiska zapósłanča frakcije Lěwicy, zetkanje pohódnoća: „Za mnje jako Łužičanku Serbja a jich nałožki do wšědneho dnja słušeja. Ale moje prěnje zetkanja ze Serbami a Serbowkami, kotřiž so za swoje prawa a swoju domiznu zasadźuja, mje sylnje pohnuwaja. Ja so na zhromadne dźěło wjeselu, dokelž wužadanja kaž změna struktury w regionje su jara wulke.”

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Póstowe naměsto 2/Postplatz 2,
02625 Budyšin/Bautzen

tel. +49 (0)3591 550-202
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button