zvolte jazyk   Rěč/Sprache/Language
zvolte jazyk
Rěč/Sprache
file.title

Nowa Radworska wjesnjanostka a Domowina chcetej na dobro serbskosće w gmejnje cyle praktisce hromadźe dźěłać


Foto w.l.: Dawid Statnik, Madeleine Rentsch, Katja Liznarjec.
Foto: Domowina

Srjedu, dnja 20.05.2020, wopytaštej předsyda Domowiny Dawid Statnik a regionalna rěčnica Domowiny Katja Liznarjec wjesnjanostku gmejny Radwor Madeleine Rentsch składnostnje wólbow do noweho hamta. W połdra hodźinskej rozmołwje informowaštaj wobaj wjesnjanostku wo dźěle Domowiny a aktiwitach serbskich cyłkow w Radworju. Přezjedni běchu sebi wšitcy třo, zo je serbskosć bohatstwo za gmejnu a zo měła so tuta tež do přichoda wobchować a dale wuwiwać.

Regionalna rěčnica poskićeše tež kontakt k serwisowemu běrowej, kotryž je partner gmejnow wosebje při korigowanju a ponowjenju dwurěčnosće gmejnow.

Wjesnjanostka rozłožowaše wo swojich cilach a dotalnych prócowanjach. Tak chce na přikład polěpšić dwurěčne wutaflowanje na a w gmejnskim twarjenju. Jako wažne widźi tež, zo měli wobydlerjo gmejny móžnosć měć, swoje naležnosće w serbskej rěči přednjesć. Za to ma serbskorěčnu sobudźěłaćerku, kotraž móže při tym pomhać. Dale informowaše, zo pyta zwólniwu wosobu gmejny, kotraž chcyła nadawk społnomócnjeneho/społnomócnjeneje za serbske naležnosće přewzać. Wosoba měła w přichodźe dźěławosć gmejny a wjesnjanostki podpěrać.

Madeleine Rentsch: „Ja widźu třěšny zwjazk Serbow jako partnera při hajenju serbskosće w našej gmejnje a wjeselu so na dalše dobre zhromadne dźěło.”

Dawid Statnik: „W serbskich naležnosćach je přeco spomóžne, hdyž wšitcy za jedyn postronk ćahnu. Za to smy dźensa za Radwor zhromadnje fundament kładli.”

 

Marcel Brauman/Braumann

nowinski rěčnik,
wosobinski referent předsydy

casnikarski powědaŕ,
wósobinski referent pśedsedarja

Pressesprecher,
persönlicher Referent des Vorsitzenden

Domowina z. t./
Domowina – Bund Lausitzer Sorben e. V.
Póstowe naměsto 2/Postplatz 2,
02625 Budyšin/Bautzen

tel. +49 (0)3591 550-202
mobil: 0171 89 83 985

marcel.brauman(at)domowina.de
presse(at)domowina.de

Facebook

Twitter

www.domowina.de


Facebook Button