Dźak za wuspěšne přewjedźenje XI. mjezynarodneho folklorneho festiwala

Za wuspěšne přihoty a přewjedźenje XI. mjezynarodneho folklorneho festiwala “Łužica” dźakuje so předsyda Domowiny Dawid Statnik w mjenje Domowiny jara wutrobnje wšěm organizatoram pod nawodom Marko Kowarja, wšěm technikarjam, pomocnikam na dworach, pomocnikam před a za jewišćemi, mějićelam dworow w Hochozy a Chrósćicach, sponsoram a podpěraćelam. “Wuměłcy z tu- a wukraja wobdarichu nas z krasnym swjedźenjom žiwjenskeje radosće a kultury ludow a wjeselimy so přez wulki zajim wopytowarjow na wšěch městnach festiwala. Wšitcy mjenowani su ze swojim angažementom na swojim městnje k poradźenju našeho festiwala přinošowali. Za to so jim jara dźakujemy.”

Štyridnjowski festiwal zakónči so njedźelu wječor w Chrósćicach. Wjace hač 20.000 wopytowarjow je sej programy w Budyšinje, Hochozy a Chrósćicach wobhladało, na kotrychž wustupi něhdźe 700 wuměłcow. “Wjeselimy so přez wuspěšny wotběh našeho festiwala, kiž wěnowaše so lětsa wosebje temje imaterielneho kulturneho namrěwstwa pod škitom UNESCO”, praji předsyda přihotowanskeho wuběrka Marko Kowar. Dwanaće wukrajnych ansamblow běchu přeprošeni a lětsa su tež wšitcy dojěli. Mjez nimi běchu wuměłcy z Mexika, Paraguaya, Indiskeje, Georgiskeje a dalšich krajow. Mjez dwanaće skupinami z Łužicy bě šěsć dorostowych skupin, kiž mějachu wosebje sobotu popołdnju w Chrósćicach na Krawčikec dworje swój wulki wustup.

Sobotu wječor běchu mějićeljo sydom Chróšćan dworow hosćićeljo za tysacy wopytowarjow. kiž dožiwichu wotměnjawe programy a rady kulinariske poskitki wužichu. Dźeń do toho wustupichu wuměłcy w Hochozy – delnjołužiska wjes bě lětsa k 5. razej hosćićelka festiwala, Tam witachu hosći při hłownym jewišću při cyrkwi kaž tež na třoch burskich statokach.

Mjezynarodny folklorny festiwal wotměje so z lěta 1995 kóždej dwě lěće. Wón so zhromadnje organizuje wot Serbskeje rejowanskeje skupiny Smjerdźaca, Serbskeho folklorneho ansambla Wudwor, gmejny Chrósćicy, Załožby za serbski lud a Domowiny – Zwjazka Łužiskich Serbow.

www.folklorefestival-lausitz.de