Słowjanski seminar w Budyšinje

Domowina je hosćićelka XVII. FUEN-seminara słowjanskich mjeńńin, kiž wotměje so wot 6. do 9. nowembra w Budyšinje. Na nim zetka so něhdźe 20 wobdźělnikow:

Ukrainjenjo z Pólskeje,
Chorwaća z Awstriskeje,
Rusinojo z Ukrainy,
Čechojo z Chorwatskeje,
Čechojo ze Słowakskeje,
Słowjency z Italskeje a
Łužiscy Serbja.

Lětuši seminar wěnuje so temje: “Instrumenty spěchowanja mjeńšin w Europje” a ma wosebje wšelake spěchowanske móžnosće wobswětlić.

Seminar zahaji so dnja 7. nowembra w 9 hodź. w Serbskim domje w Budyšinje, hdźež postrowitaj zapósłanc Sakskeho krajneho sejma Marko Šiman a předsyda Domowiny Dawid Statnik wobdźělnikow.
Žurnalisća su na tutón termin/fotowy termin wutrobnje přeprošeni.

Do programa słušeja wšelake přednoški a wuměna nazhonjenjow, na přikład wo spěchowanju narodnych mjeńšin w Chorwatskej, ale tež wjedźenje po Budyšinje, wopyt Krabatoweho młyna w Čornym Chołmcu, rozmołwa z čěskim generalnym konsulom PhDr. Jiří Kudělu kaž tež dalše kulturne poskitki.

(FUEN = Federalistiska Unija Europskich Narodnych skupin)