FUEN-seminar słowjanskich mjeńšinow

„Zhromadne dźěło słowjanskich mjeńšin pod třěchu FUEN” rěka tema lětušeho seminara Federalistiskeje unije europskich narodnych skupin (FUEN), kiž wotměje so wot 15. do 18. oktobra pola čěskeje mjeńšiny w Daruvaru w Chorwatskej. Delegaciji Domowiny přisłušeja mjez druhim předsyda Dawid Statnik, jednaćel Domowiny a wiceprezident FUEN Bjarnat Cyž, zastupowacy jednaćel Marcus Końcaŕ a referent za kulturu a wukraj Clemens Škoda.

Lětuši seminar ma tři hłowne zaměry, praji dźensa w Budyšinje Bjarnat Cyž: “Sprěnja budźemy přihotować wólbnu zhromadźiznu a FUEN-kongres 2016 we Wrócławju, zdruha chcemy so dorozumić wo dalšich zhromadnych aktiwitach na polu projektoweho dźěła a móžnosćow jeho spěchowanje ze srědkami Europskeje Unije. Jako třeće ćežišćo smy sej předewzali, kwalifikować internetowu stronu dźěłoweje skupiny słowjanskich mjeńšinow FUEN a z tym naše zjawnostne dźěło polěpšić.”

FUEN je z wjace hač 90 čłonskimi organizacijemi w 33 europskich krajach najwjetši třěšny zwjazk awtochtonych narodnych mjeńšinow abo ludowych skupin w Europje. Wona bu 1949 w Parisu załožena. Domowina organizuje wot lěta 1996 seminary za słowjanske mjeńšiny FUEN.