XIV. mjezynarodny folklorny festiwal ŁUŽICA 2023

Wot 6. do 9. Julija 2023 wotměje so we Łužicy hižo k 14. razej mjezynarodny folklorny festiwal „Łužica“.

Naše serbske rejowanske a folklorne skupiny su ansamble ze wšeho swěta přeprosyli, kotrež budu zajimowanemu publikumej wotměnjawy a pisany program skićić. Při wuzwolenju wobdźělnikow je so na to dźiwało, zo su to zastupjerjo ludowych skupin a mjeńšin. Wosebje maja so jich tradicije a nałožki předstajić, kotrež steja na UNESCO – lisćinje imaterielneho swětoweho herbstwa. Witać směmy lětsa hosći ze Sri Lanki, Španiskeje (Mallorca), Rumunskeje, Estiskeje, Serbiskeje, Słowakskeje a našeju susodneje krajow, Pólskeje a Čěskeje. Wězo budźe tež serbska kultura sylnje zastupjena.

Zazběh je štwórtk, 06.07.23 ze swjedźenskim ćahom wšěch wobdźělnikow po Budyšinje - wot Serbskeho domu, přez Lawske hrjebje, Nutřkownu Lawsku a Hłowne torhošćo k Žitnym wikam. Wječor přizamknje so swjatočne zahajenje na hłownym jewišću Němsko-Serbskeho ludoweho dźiwadła.

Pjatk je Hochoza w Delnjej Łužicy hosćićel za estradu mjezynarodneje folklory. We 18.00 hodź. so na swjedźenišću při wjesnej cyrkwi wječor swjatočnje zahaji. Wopytowarjo festiwala małeje wjeski njedaloko Picnja móža potom mnohotnosć kultury ze wšeho swěta blisko dožiwić a so wot spěwow a rejow wobkuzłać dać. Na třoch burskich dworach a na cyrkwinskej łuce poskića so jim zahorjace programy połne emocijow a jónkrótnych wokomikow. A wězo postaraja so Hochoženjo tež wo čerstwe regionalne speciality. Hač do pózdnjeje nocy móže so pod hwězdnym njebjom Delnjeje Łužicy swjećić, za młodych a staršich zaklinči live hudźba na dworje „Hórske hrody (Bergschlösschen)“.

Tradicionelnje su Chrósćicy sobotu a njedźelu wuhotowar folklorneho festiwala. Na pjeć swjedźensce wupyšenych dworach zaklinča najwšelakoriše spěwy a zahorjaca hudźba. Ze zapalom přednjesene reje zawěsće wjeselo pola publikuma wubudźa. Nimo toho tež wikowarjo sobotu popołdnju twory ludoweho wuměłstwa poskićuja.

Na Kralec statoku prezentuja so přihladowarjam pokłady imaterielneho kulturneho herbstwa. Na Krawčikec štyristronskim dworje budźe dorost swoje kmanosće prezentować. Šulerki a šulerjo z wjacorych kubłanišćow pokazaja w swojich programach, kak jich mjezynarodna folklora inspirěruje a fascinuje. Serbski ludowy ansambl prezentuje na pózdnim popołdnju swój galaprogram „Folklora“ na farskim dworje.

Z festiwalnej fanfaru zahaji so potom dypkownje w 19.00 hodź. kulturny wječor, kotryž zawěsće kóždemu wopytowarjej něšto skići. Na pózdnim wječoru sćěhuje z programom „Chrósćicy special“ nóc pisaneje kulturneje mnohotnosće, při rejach a spěwanju wosebje za młodźinu, ale wězo tež wšitkich, kotřiž so młodźi čuja.

Po zwučenym wašnju so na wjacorych městnach kulinariske chłóšćenki z Łužicy, ale tež wot našich hóstnych skupin poskićeja.

Program njedźelu zahaji so z wjacerěčnymi swjedźenskimi kemšemi w Chrósćicach. Po tym móža wopytowarjo po wikach tradicionalnych přemysłow dundać abo sebi z wobšěrneho wuběrka jědźow něšto popřeć. Potom pak njech nichtó njeskomdźi swjedźenski ćah po krasnje wupyšenej wjesce, tematiski program łužiskich folklornych skupin abo wulke festiwalne finale. Na wulkim hłownym jewišću při pomniku zakónči so lětuši festiwal z folkloristiskim wohnjostrojom jónkrótnych rejowanskich a hudźbnych poskitkow jednotliwych skupinow.

Přeprošujemy Was wutrobnje na XIV. mjezynarodny folklorny festiwal do Łužicy! Dajće so wobkuzłać wot hudźby, rejow a spěwow nimale 1.000 aktiwnych sobuskutkowacych a zapleńčić wot łužiskeje hospodliwosće.

Předpředań kartkow započnje so z dźensnišim dnjom.

Za galaprogram k zahajenju festiwala štwórtk, 6. julija, w 19.30 hodź. na hłownym jewišću Němsko-Serbskeho ludoweho dźiwadła w Budyšinje su kartki jenož při dźiwadłowej kasy na předań a płaća 15 € (potuńšene 10 €) w předpředani, při wječornej kasy za 20 € (potuńšene 14 €).

Za festiwalny wječor w Hochozy předawaja hamt Picnjo, Lodka w Choćebuzu a Hildegard Zeumke w Hochozy kartki za 10 €. Při wječornej kasy pjatk, 07.07.2023 płaća wone 15 €.

Za programy sobotu w Chrósćicach płaći zastupny lisćik w předpředani 20 €. Z tutym je tež njedźelu bjezpłatny wopyt zarjadowanjow móžny.

Za dorosćenych a za swójby, kotrež swójbny pas předpołoža, płaći zastupny lisćik w předpředani 20 € na dorosćeneho, a za dźěći njetrjeba so zastup płaćić.

Potuńšene kartki za šulerjow, studentow a zbrašenych poskićeja so w předpředani za 10 €. Wotpowědny płaćiwy wupokaz dyrbja woni předpołožić.

Za dźěći hač do 6 lět je zastup darmotny.

Při wječornej kasy su zastupne lisćiki 5 eurow dróše.

Předpředań zakónči so 30.06.2023.

Zastupne lisćiki móžeja sebi zajimcy kupić w Serbskej kulturnej informaciji w Budyšinje, pola časnikarja Njeka w Chrósćicach kaž tež we wobchodźe “Kostrjanc” w Ralbicach.