select language   Rěč/Sprache/Language
select language
Rěč/Sprache
file.title

Rozprawa změrcowskeho wuběrka za 17. hłownu zhromadźiznu Domowiny dnja 28.03.2015

Wot apryla 2013 hač do měrca 2015 přewjedźe změrcowski wuběrk dźesać posedźenjow. Na konstituowacym posedźenju wuzwoli so bratr Kozel znowa jako předsyda změrcowskeho wuběrka, kiž pak je dnja 24. měrca swoje sobudźěło złožił. Dale słušeja do změrcowskeho wuběrka dr. Pětr Brězan jako naslědnik za bratra Glücklicha, Jěwa-Marja Čornakec, dr. Ludwig Ela a Gabriela Korchowa.

Na prěnich wuradźowanjach debatowaše změrcowski wuběrk wo změnach změrcowskeho porjada. Nastork k tomu je předchadźacy změrcowski wuběrk na zakładźe praktiskich nazhonjenjow a nowych wusudow statnych sudnistwow k problematice změrcowskich wuběrkow w němskim towarstwowym prawje dał. Na někotrych wuradźowanjach wobdźěli so tež předsyda Domowiny Dawid Statnik. Tutón dialog bě nowum w dźěławosći změrcowskeho wuběrka.

Zwjazkowe předsydstwo je dnja 15.04.2014 zdźěla změnjeny změrcowski porjad schwaliło (předłoha ZP 36/2014), kiž wot tutoho dnja płaći.

Nowe je na přikład, zo móže předsyda změrcowskeho wuběrka zwólniweho čłona změrcowskeho wuběrka zdobyć, kiž wjedźe z woběmaj stronomaj změrcowsku rozmołwu do zahajenja změrcowskeho jednanja. Z tym poskići změrcowski wuběrk změrowanje konflikta bjez jednanja. Změrcowski wuběrk budźe pak dale wužadany, swój dźěłowy grat – to rěka změrcowski porjad – po potrěbnosći aktualizować. To płaći tež za dotal ze zwjazkowym předsydstwom njewudiskutowane namjety k změnam změrcowskeho porjada.

Kaž je předsyda w swojej rozprawje naspomnił, su so třo čłonojo Domowiny dnja 25.11.2014 ze zapodaćom na změrcowski wuběrk nastupajo listowanje dla nowelěrowanja serbskeho zakonja mjez předsydu Domowiny a zapósłancami Sakskeho krajneho sejma wobroćili.

Na swojim posedźenju dnja 17.12.2014 je změrcowski wuběrk bratra dr. Ludwiga Elu po dypku 4. (1) našeho změrcowskeho porjada pomjenował jako wujednarja. Wšitke wobdźělene strony běchu zwólniwe k wujednanskim rozmołwam. K realnemu wujednanju pak w tutych rozmołwach njedóńdźe, tak zo dyrbješe změrcowski wuběrk dnja 27.01.2015 ertne jednanje přewjesć.

Jako konkluzije z tutoho změrcowskeho pada namjetuje změrcowski wuběrk zwjazkowemu předsydstwu wotpowědnje art. 3. sada 2 změrcowskeho porjada:

Prezidij a zwjazkowe předsydstwo měłoj dokładnišo z wobzamknjenjemi dźěłać (hlej jednanski porjad): to rěka eksaktnosć, aktualnosć, dodźerženje a staw realizacije prawidłownje kontrolować a w trěbnym padźe precizować abo změnić.

Kwalifikować měło so zjawnostne dźěło z materialijemi hłowneje zhromadźizny a zwjazkoweho předsydstwa nastupajo zasadne wobzamknjenja, kaž na přikład prašenje nowele zakonja a modusa wólbow gremijow.

Změrcowski wuběrk zwěsći, zo běchu zapodaća a wuwjedźenja někotrych próstwarjow zdźěla njekonkretnje a njewěcownje formulowane a zo so konflikty w zmysle změrcowskeho porjada jasnje dosć njewopisowachu.

Dnja 17.02.2015 sformulowachu próstwarjo stejišćo k wusudej změrcowskeho wuběrka Domowiny. We hłownym kritizowachu pře wusku interpretaciju změrcowskeho porjada w ertnym jednanju. Změrcowski wuběrk je so z tutym stejišćom w swojim posedźenju dnja 24.02.2015 zaběrał a za we wěcy njewoprawnjene wobhladował.

Dalše wobjednanje změrowanskeho namjeta ma zwjazkowe předsydstwo na swojich přichodnych wuradźowanjach předwidźane.

Na kóncu chcu so pola wšitkich čłonow změrcowskeho wuběrka wutrobnje podźakować. Woni su w zašłymaj lětomaj za našu Domowinu wažne dźěło wukonjeli.


Facebook Button